MANILA, Philippines — Bahagyang humina ang bagyong Champi ngunit inaasahang lalakas muli bilang super typhoon bago pumasok sa Philippine Area of Responsibility (PAR) sa Martes, ayon sa Philippine Atmospheric, Geophysical and Astronomical Services Administration (PAGASA).
Ipinaliwanag ng PAGASA na dulot ng eyewall replacement cycle ang paghina ng bagyo. Sa prosesong ito, nabubuo ang bagong eyewall sa paligid ng dati, na kalauna’y napapalitan. Kapag natapos ang prosesong ito, maaari muling lumakas ang bagyo.
Bandang alas-3 ng madaling araw nitong Lunes, namataan ang Champi sa layong 1,720 kilometro silangan ng timog-silangang Luzon. Taglay nito ang maximum sustained winds na 175 kilometro kada oras (kph), pagbugsong umaabot sa 215 kph, at kumikilos pa-kanluran-hilagang-kanluran sa bilis na 25 kph.
Kapag pumasok sa PAR, tatawagin itong Rosal. Inaasahang kikilos ito pahilagang-kanluran sa Philippine Sea at maaaring manatiling super typhoon hanggang Huwebes bago humina bilang typhoon malapit sa Extreme Northern Luzon.
Posibleng mag-landfall ang bagyo sa Taiwan sa Biyernes at lumabas ng PAR sa Sabado.
Dahil sa lawak ng wind field nito, maaaring magtaas ng wind signals sa ilang bahagi ng Bicol Region at Northern Luzon pagsapit ng Lunes ng gabi o Martes ng umaga. Maaari ring magdala ng kalat-kalat na pag-ulan ang trough o extension ng bagyo sa silangang bahagi ng bansa.
Posibleng magsimulang lumala ang panahon sa Batanes at Babuyan Islands sa huling bahagi ng Miyerkules. Maaaring makaranas ang mga lugar na ito ng napakalalakas na hangin na katumbas ng Wind Signal No. 3 o 4, kasama ang malakas hanggang napakalakas na pag-ulan, lalo na sa Biyernes.
Maaari ring makaranas ng ulan at malalakas na bugso ng hangin ang ilang bahagi ng mainland Northern Luzon mula Huwebes hanggang Sabado. Inaasahan din ang kalat-kalat na pag-ulan sa Palawan, Western Visayas, Negros Island Region, Zamboanga Peninsula at Sulu Archipelago sa kaparehong panahon.
Samantala, habang malayo pa sa bansa ang super typhoon, ang Intertropical Convergence Zone (ITCZ) sa Palawan at kanlurang Mindanao, kasama ang easterlies sa nalalabing bahagi ng bansa, ang nakaaapekto sa panahon ngayong Lunes.
Inaasahan ang maulap na kalangitan at kalat-kalat na pag-ulan sa Bicol Region, Quezon, MIMAROPA, Zamboanga Peninsula, Basilan at Tawi-Tawi. Sa Metro Manila at iba pang bahagi ng bansa, magiging mainit at maalinsangan ang panahon, na may posibilidad ng panandaliang pag-ulan o thunderstorms sa hapon at gabi.
Nasa transisyon pa ang bansa patungo sa Amihan season, na maaaring magsimula sa huling bahagi ng Oktubre o unang bahagi ng Nobyembre dahil sa El Niño.
Ayon sa naunang ulat ng PAGASA, maaaring umabot sa pinakamalakas na antas sa Disyembre ang umiiral na malakas hanggang napakalakas na El Niño sa tropical Pacific Ocean, na posibleng magdulot ng mas tuyo at mas mainit na panahon sa Amihan season. RNT/MDS
