MANILA, Philippines- Nagbabala ang Commission on Higher Education nitong Biyernes hinggil sa pekeng anunsyo para sa scholarship application.
“There is NO current call for SIKAP applications for 2024,” pahayag ng CHED sa gitna ng “fake news” na kumakalat online na nananawagan para sa aplilkasyon sa Scholarship for Instructors’ Knowledge Advancement Program (SIKAP) for 2024.
Nagbibigay ang SIKAP ng oportunidad para sa Higher Education Institution (HEI) teaching at non-teaching personnel, o dating HEI teaching o non-teaching personnel na nais pang hasain ang kaalaman sa mga tinukoy na unibersidad at kolehiyo sa Pilipinas.
Saklaw ng grant ang aktuwal na tuition at school fees, kabilang ang P37,000 living allowance kada buwan para sa scholars ng Master’s Degree, P50,000 living allowance para sa mga kumukuha ng Doctorate Degree, P24,000 book allowance kada school year, at P24,000 transportation allowance.
Nag-abiso ang CHED sa publiko na sumangguni sa CHED official website sa ched.gov.ph at Official Facebook page ng CHED sa facebook.com/PhCHED.gov para sa anunsyo.
Maaari ring kontakin ng mga indibidwal ang kani-kanilang CHED Regional Office o bumisita sa ched.gov.ph/sikap para sa inquiries. RNT/SA
