BEIJING, China – Ayon sa Embahada ng Pilipinas sa Beijing na inaasahang darating sa Maynila ang isang trade mission mula sa China sa Oktubre upang bigyan ng pagkakataon ang mga negosyong Tsino na galugarin ang mga opsyon sa pamumuhunan sa bansa.
Ito ay matapos na makipagtulungan ang mga opisyal ng Pilipinas sa Global Investment Council (GIC) para mag-organisa ng investment mission dahil sa symposium na inorganisa ng Philippine Embassy sa Beijing at ng Department of Trade and Industry-Philippine Trade & Investment Center noong Agosto 22.
Inilarawan ni Philippine Ambassador Jaime FlorCruz ang symposium bilang isang pagkakataon upang lumikha ng mga bagong partnership at tuklasin ang mga pagkakataon upang magdala ng karagdagang kaunlaran sa dalawang bansa.
Binigyang-diin din ang kahalagahan ng naturang pagpapalitan ng negosyo habang ginugunita ng dalawang bansa ang ika-50 anibersaryo ng relasyong diplomatiko ngayong taon.
“The Philippines continues to be open for business with an enhanced business climate, and highlighted that now is a great time to invest,” aniya.
Isinaad naman ni Philippine Commercial Counselor Glenn Peñaranda ang kahalagahan ng forum sa pagbuo ng interes para sa merkado ng Pilipinas.
“The forum generated more interest in investment opportunities in the Philippines, and we are optimistic to have a successful outcome of the investment mission in October,” aniya, na nagsasabing ang China ay ang pinaka malaking trading partner ng Pilipinas at isa sa top sources ng investments.
Kasama sa mga dumalo ang 40 negosyo mula sa GIC, mga kinatawan mula sa China-Philippines Chamber of Commerce (CPCC), Chinese Entrepreneurs Association of the Philippines (CEPA), gayundin mula sa BdO China at Liwayway.
Ayon sa embahada, ang GIC ay isang non-profit at non-government organization para sa pagpapadali sa mga internasyonal na pamumuhunan na gumagamit ng mga internasyonal na mapagkukunan at mga karanasang eksperto na may kaugnayan sa mga asosasyon ng negosyo at industriya sa buong mundo. RNT/MND
