MANILA, Philippines – Sumailalim na sa inquest ang Chinese national na umano’y nagrerecruit ng mga aktibo at retiradong sundalo sa pamamagitan ng social media, sinabi ng Department of Information and Communications Technology (DICT) nitong Biyernes, Disyembre 6.
Ayon sa ulat, tinukoy ang 38-anyos na Chinese national na si alyas “Robin,” isang illegal alien na aktibo umanong sangkot sa recruitment advertisements sa Facebook.
Noong Abril, sinabi ni DICT Undersecretary for Cybersecurity and Upskilling Jeffrey Ian Dy na may hinihinalang mga Chinese company na nagpapanggap na American at European enterprises na nagrerecruit ng mga aktibo o retiradong miyembro ng Philippine military.
Ani Dy, nag-aalok ang mga ito ng part-time jobs bilang analysts online sa sahod na daan-daang dolyar kada oras.
Unang namonitor ng DICT ang online recruitment ng mga kompanyang ito noon pang Disyembre 2023. RNT/JGC
