PASAY CITY, Philippines – Inaresto ng mga tauhan ng Bureau of Immigration (BI) ang isang Chinese national na umano’y sangkot sa malawakang online scam sa isinagawang joint operation kasama ang National Bureau of Investigation–Operative Technical Cyber Division (NBI-OTCD) at ang Cybercrime Investigation and Coordinating Center (CICC) sa Pasay City.
Sa ulat ng Fugitive Search Unit (FSU) ng BI, sa pakikipagtulungan ng mga operatiba ng NBI at CICC, ay nagpatupad ng isang enforcement operation noong gabi ng Nobyembre 4, sa Central Park Condominium, D. Jorge Street, Pasay City.
Ang operasyon ay isinagawa alinsunod sa isang mission order na inisyu laban kay Xiang Longyiyu, kilala rin bilang Sam Lee, 33, isang Tsinong mamamayan, na pinaghihinalaang sangkot sa mga online fraud at phishing activities na tumatarget sa mga lokal at dayuhang biktima.
Ang operasyon ay nag-ugat sa isang pormal na kahilingan mula sa CICC, na humihingi ng tulong sa pagsubaybay sa mga aktibidad ng suspek kasunod ng mga ulat ng intelligence na nag-uugnay sa kanya sa mga online financial scam.
Ipinahiwatig ng mga ulat na si Xiang ay nagpapatakbo sa ilalim ng isang “work-from-home” na sistema at dating nauugnay sa isang scam hub na binuwag noong unang bahagi ng taong ito sa Makati City. Naiulat na nagpapatuloy siya sa mga mapanlinlang na aktibidad gamit ang maraming laptop computer.
Batay sa record ng BI, dumating si Xiang sa Pilipinas noong 2019, bilang temporary visitor. Ang kanyang huling extension ng visa ay nag-expire noong 2022, kaya’t itinuring na ito na overstaying alien. Ipinakita ng mga karagdagang pagsusuri na siya ay nasa ilalim na ng Blacklist Order na inisyu noong 2023 dahil sa overstaying.
Ang naarestong indibidwal ay dinala na sa Warden Facility ng BI kung saan siya mananatili habang hinihintay ang proseso ng deportasyon. JAY Reyes
