Chiz, Revilla, Co, Nancy Binay, Usec kinaladkad ni Bernardo sa flood control mess

MANILA, Philippines – Umamin si dating Department of Public Works and Highways Undersecretary Roberto Bernardo sa kanyang naging papel sa anomalya sa mga flood control project at humiling na maging state witness.

“Ako po ay umaamin sa aking mali nagawa… Taos puso at puno ng pagsisisi na ako ay humihingi ng kapatawaran sa Diyos, sa ating bansa, at kababayan… Handa ako gawin ang lahat ng nararapat upang maiwasto ang aking kamalian at maiwasan na ito’y mangyari muli,” pahayag ni Bernardo sa pagdinig ng Senate blue ribbon committee.

Ayon sa kanya, sangkot ang apat na senador, isang kongresista, isang miyembro ng constitutional commission, at isang undersecretary, na aniya’y “matinding nagpapababa sa tiwala ng publiko” at nagdudulot ng banta sa pambansang seguridad.

Pinangalanan niya sina Sen. Jinggoy Estrada at Joel Villanueva, dating Sen. Bong Revilla Jr., Ako Bicol Rep. Zaldy Co, at dating Caloocan Rep. Mitch Cajayon, na una na ring binanggit ni dating DPWH engineer Henry Alcantara.

Dagdag pa ni Bernardo, naghatid siya ng ₱160 milyon — katumbas ng 20% ng halos ₱800 milyon proyekto — kay Meynardo na umano’y para kay Sen. Chiz Escudero. Tinukoy rin niya sina dating Sen. Nancy Binay, Revilla, at Co na kasali sa iskema.

Nakapagsumite na si Bernardo ng aplikasyon sa Witness Protection Program.

Hiniling ni Justice Secretary Jesus Crispin Remulla na dalhin siya sa DOJ para suriin ang kanyang testimonya, na agad namang inaprubahan ng komite. RNT