MANILA, Philippines – Bagama’t tumanggi ang Criminal Investigation and Detection Group (CIDG) na magkomento sa mga ulat ng International Criminal Court (ICC) arrest warrant laban kay Sen. Ronald “Bato” dela Rosa, sinabi ng police unit na handa itong ipatupad ang kautusan.
“As of now, I cannot comment on that. But if there is an order from a competent court, whoever is named there, we will implement the warrant of arrest,” ayon kay CIDG Director Maj. Gen. Robert Alexander Morico II.
Nauna nang ibinunyag ni Ombudsman Jesus Crispin Remulla ang pagkakaroon ng dapat na warrant laban kay Dela Rosa.
Sa kabila ng sinabi ng Justice and Interior Department na walang natanggap na warrant of arrest ang gobyerno ng Pilipinas, nanindigan si Remulla sa kanyang claim noong Martes, na nagsabing personal siyang nakatanggap ng electronic copy.
Sa isang panayam sa DZMM nitong Miyerkules, sinabi ng kanyang kapatid na si Interior Secretary Jonvic Remulla, na natanggap ng ombudsman ang kopya ng warrant mula sa isang “credible source,” ngunit “not actionable” ang dokumento dahil hindi pa ito dumaan sa mga opisyal na channel.
Ang CIDG, sa ilalim noon ni Direktor Maj. Gen. Nicolas Torre III, ang iniulat na nagsilbi ng warrant of arrest ng ICC laban kay dating Pangulong Duterte noong Marso. RNT/MND
