MANILA, Philippines – Tiwala ang pamahalaan ng Pilipinas na matutupad ng Indonesia ang kanilang kasunduan sa suplay ng coal sa kabila ng desisyon ng naturang bansa na bawasan ang pag-export ng natural gas sa Singapore.
Ayon kay Department of Energy (DOE) Secretary Sharon Garin, tiniyak ng Indonesia na tutuparin ng dalawang panig ang kanilang mga kontrata sa coal sa kabila ng pagbabago sa mga patakaran nito sa pag-export upang mapahusay ang transparency at pagsubaybay sa supply chain.
“We have received assurance about the supply, and we asked them if they could keep the price stable despite the changes,” pahayag ni Garin sa mga mamamahayag sa sidelines ng Singapore International Energy Week.
Dagdag pa niya, wala pang katulad na problemang kinakaharap ang Pilipinas sa suplay ng coal gaya ng iniulat na isyu ng Singapore sa natural gas.
Batay sa mga ulat, nagpasya ang Indonesia na bawasan ang pag-export ng gas sa Singapore upang unahin ang pangangailangan nito sa kuryente sa loob ng bansa, habang pinananatili ang mga export sa loob ng napagkasunduang limitasyon.
Sa Pilipinas, halos 85 porsiyento ng suplay ng coal ay inaangkat mula sa Indonesia. Ayon kay Garin, mahalaga ang coal mula sa naturang bansa dahil malaki ang pagdepende ng sistema ng kuryente ng Pilipinas sa ganitong uri ng panggatong.
Tinatayang 60 porsiyento ng kabuuang produksiyon ng kuryente sa bansa ay nagmumula sa coal, na nagsisilbing pangunahing pinagkukunan ng tuloy-tuloy na suplay ng kuryente o baseload power.
Samantala, nakatakdang maglabas ang pamahalaan ng coal transition policy na maaaring magbigay-daan sa pagsisimula ng operasyon ng mga kontratang may kapasidad na 3 hanggang 5 gigawatts ng baseload power na kasalukuyang hindi aktibo.
Nasa 25 porsiyento naman ang bahagi ng renewable energy sa kabuuang suplay ng kuryente ng bansa, malayo pa sa target ng pamahalaan na itaas ito sa 35 porsiyento pagsapit ng 2030.
Sinabi rin ni Garin na seryosong pinag-aaralan ng DOE ang pagtatayo ng coal blending facility o coal terminal.
Sa pamamagitan nito, maaaring pagsamahin ang coal na may mataas at mababang kalidad mula sa lokal at dayuhang pinagkukunan upang makabuo ng angkop na halo para sa iba’t ibang pangangailangan ng mga industriya. RNT/JGC
