MANILA, Philippines – Hinimok ng Commission on Elections (Comelec) ang publiko lalo na ang mga bago at first-time voters na makilahok sa nationwide voter registration na nagsimula nitong Biyernes, Agosto 1.
Iniulat ni Comelec Chairperson George Garcia ang malakas na turnout ng registration sa mga opisina ng election officers, satellite registration sites sa buong bansa at ang Special Register Anywhere/Anytime Program (SRAP) sites sa Metro Manila, sa kabila na ang kickoff ay tumapat ng weekday.
“This favorable outcome during the first day of voter registration is a clear testament of the Filipino people’s willingness to exercise their right of suffrage come next elections and actively participate in the democratic process,” ani Garcia.
Sinabi pa niya na inaasahang makakahatak ito ng isang milyong bagong registrants sa loob ng 10-day registration period, kabilang ang nasa 500,000 youth voters edad 15 hanggang 17, at karamihan sa mga ito ay magpaparehistro bilang first time voters.
Ang voter registration ay para sa papalapit na Barangay and Sangguniang Kabataan Elections (BSKE) na itinakda sa Disyembre 1, 2025.
Tatakbo ang voter registration hanggang Agosto 10, habang ang mga serbisyo ng SRAP sa National Capital Region ay available hanggang Agosto 7.
Hinimok din ni Garcia ang publiko lalo na ang mga bumibisita sa Intramuros na magparehistro rin sa Comelec main office.
Ang SRAP ay isinasagawa sa Chairman’s Hall, Ground Floor ng Palacio del Gobernador sa Intramuros, Manila mula alas-8 ng umaga hanggang alas-5 ng hapon hanggang Agosto 7.
“We invite the public to take advantage of the SRAP services, while enjoying the sights of historic Intramuros,” dagdag ni Garcia. RNT/JGC
