MANILA, Philippines – Hinimok ni Commission on Elections (Comelec) chair George Garcia ang mga natanggal sa listahan ng mga botante ng poll body na samantalahin ang isinasagawang pagpaparehistro para makasali sila sa susunod na halalan.
“Meron po tayong ongoing registration, meron tayong tinatawag na “reactivation”… Ang ibig sabihin ng reactivation kahit sila ay natanggal, hindi ibig sabihin hindi na sila botante. Botante pa din sila, andiyan ang record pero ang dating, ang parusa ng batas eh hindi ka muna pabobotohin,” ani Garcia sa isang radio interview.
Noong Biyernes, sinabi ng Comelec na nasa 4.2 milyong pangalan ang tinanggal sa opisyal na listahan ng mga botante. Karamihan sa mga na-delist ay mula sa Rehiyon IV-A (Calabarzon).
Ang mga dahilan para sa pag-delist ay ang hindi pagboto sa dalawang magkasunod na naunang regular na halalan, sa pamamagitan ng utos ng hukuman, pagkawala ng pagkamamamayang Pilipino, at pagkakaroon ng mga di-wastong dokumento.
“Ngayon po, ang listahan pong yan ay available sa bawat local COMELEC. Alam naman nila kung nakaboto sila o hindi,” ani Garcia.
Ang panahon ng pagpaparehistro ng mga botante para sa midterm polls ng Mayo 2025 ay nagsimula noong Pebrero 12 at magtatapos sa Setyembre 30, 2024.
“Kaya po, reactivate, ongoing naman po ang registration natin hanggang September 30. Kaya mas maganda na magpa-reactivate ang mga matatanggal diyan sa deactivation,” giit pa ni Garcia.
Maaaring magparehistro ang mga aplikante mula Lunes hanggang Sabado, 8 a.m. hanggang 5 p.m., sa alinmang tanggapan ng Comelec sa buong bansa.
Nauna nang sinabi ng Comelec na noong Mayo 5, 2024, mahigit 2.5 milyong bagong botante na ang nakarehistro para sa 2025 nasyonal at lokal na halalan, malapit na sa tatlong milyong target na itinakda ng poll body. RNT
