MANILA, Philippines – Kinondena ng Estados Unidos ang “mapanganib” na kilos ng isang helikopter ng militar ng China na lumapit sa isang eroplanong Pilipino sa Bajo de Masinloc.
Hinimok ni US Ambassador MaryKay Carlson ang China na umiwas sa pananakot at lutasin ang mga alitan sa mapayapang paraan.
Nangyari ang insidente habang nasa maritime patrol ang eroplanong Bureau of Fisheries and Aquatic Resources (BFAR). Isang helikopter ng China, may tail number 68, ang lumapit nang delikado, lumalabag sa pandaigdigang regulasyon sa abyasyon.
Maghahain ng diplomatic protest ang Pilipinas.
Itinanggi ng China ang paratang, sinabing ilegal na pumasok ang eroplanong Pilipino sa kanilang teritoryo at nagpakalat ng maling impormasyon.
Ang Bajo de Masinloc, na nasa loob ng eksklusibong economic zone ng Pilipinas, ay nananatiling sentro ng tensyon sa kabila ng 2016 Hague ruling na nagbasura sa malawakang pag-angkin ng China sa South China Sea. Hindi kinikilala ng China ang naturang desisyon. RNT
