MANILA, Philippines – NAKATAKDANG tintahan ni Pangulong Ferdinand Marcos Jr. ang deklarasyon ng pagtanggap sa Timor-Leste sa Association of Southeast Asian Nations (ASEAN) bilang pang-11 miyembro nito.
Sinabi ni Department of Foreign Affairs Spokesperson Angelica Escalona na isa ito sa mga magiging aktibidad ni Pangulong Marcos sa event na naka-iskedyul mula October 26 hanggang 28.
Sa press briefing sa Malakanyang, sinabi ni Escalona na sasaksihan din ni Pangulong ang paglagda sa Second Protocol to Amend the ASEAN Trade in Goods Agreement at ang ASEAN-China Free Trade Area 3.0 Upgrade.
“In all these engagements, the president will advance Philippine interests in ASEAN by strengthening security and stability, enhancing economic cooperation, and broadening engagement with dialogue partners,” ayon kay Escalona.
Idagdag pa rito, pag-uusapan ng mga ASEAN leaders ang iba’t ibang global issues, kabilang na ang situwasyon sa Myanmar, economic uncertainty, at iba pang geopolitical at geoeconomic challenges na nakakaapekto sa rehiyon.
“To date, there are 80 outcome documents that are expected to be issued, adopted or noted during the summits,” aniya pa rin.
Sa kabilang dako, inaasahan naman na dadalo si Pangulong Marcos sa high-level meetings, kabilang na ang 28th ASEAN Plus Three Summit, 5th Regional Comprehensive Economic Partnership Leaders’ Summit, 20th East Asia Summit, 15th ASEAN-United Nations Summit, at marami pang iba.
Nakatakda namang umalis ang Pangulo mula Maynila para magpartisipa sa 47th ASEAN Summit and Related Summits sa Malaysia sa October 25.
Sa huling araw ng event, sa October 28, idaraos ang seremonya para sa turnover ng liderato ng ASEAN mula Malaysia sa Pilipinas.
“Building upon the success of previous ASEAN Chairs, the Philippines will take this opportunity to introduce how we will steer the future of the region and beyond by galvanizing community-building efforts during our Chairship,” ang sinabi pa rin ni Escalona. Kris Jose
