MANILA, Philippines – Napansin ng Department of Health (DOH) noong Huwebes, Nob. 7, ang pagbaba ng kaso ng dengue sa buong bansa.
Noong Oktubre 2024, iniulat ng DOH ang kabuuang 314,785 na kaso ng dengue sa buong bansa.
“Ang mga kaso ay bumababa sa pangkalahatan, na nagpapakita ng 8% na pagbaba mula Setyembre 29 hanggang Oktubre 12, 2024, na may 21,097 kaso ang naiulat kumpara sa 23,032 na mga kaso na naiulat mula Setyembre 15 hanggang 28, 2024,” sabi ng DOH sa isang pahayag.
“Lahat ng rehiyon sa buong bansa ay hindi nagtala ng pagtaas sa panahong ito, maliban sa National Capital Region (mula 2,765 kaso tungo sa 3,002 kaso), Central Luzon (mula 2,219 kaso tungo sa 2,351 kaso), at CALABARZON (mula 2,907 kaso tungo sa 3,513 kaso),” dagdag ng DOH.
“Nakikita sa ating mga datos na patuloy na bumababa ang kaso ng mga namamatay dahil sa dengue,” ani DOH Secretary Teodoro Herbosa.
Lumabas sa datos ng DOH na sa bawat isang daang Pilipinong na-diagnose na may dengue, “bumaba” ang bilang ng mga namamatay ngayong taon kumpara noong nakaraang taon.
“Isang mas mababang Case Fatality Rate (CFR) na 0.26% ang naobserbahan noong Oktubre 26, 2024, kumpara sa CFR noong nakaraang taon na 0.34% para sa parehong panahon ng pagsubaybay,” sabi ng DOH.
Bagama’t mas kakaunti ang naitala ng DOH dahil sa dengue, pinaalalahanan ni Herbosa ang publiko na manatiling alerto.
“Hindi tayo dapat maging kampante dahil patuloy ang pag-ulan sa panahon na ito,” aniya.
Binanggit din ng DOH na posibleng dumami ang breeding ground ng lamok sa tag-ulan dahil sa akumulasyon ng stagnant water sa ilang rehiyon. RNT
