MANILA, Philippines – Maaaring mangailangan ng supplemental budget ang Department of Migrant Workers (DMW) mula sa pambansang pamahalaan upang pondohan ang repatriation ng mga Pilipino sa gitna ng tumitinding tensyon sa Gitnang Silangan.
Sa pagdinig ng Senate Committee on Foreign Relations, tinanong ni Risa Hontiveros kung kailangan bang magpasa ang Kongreso ng supplemental budget upang matulungan ang overseas Filipino workers (OFWs) sa rehiyon.
Ayon kay DMW Secretary Hans Leo Cacdac, maaaring kailanganin ang karagdagang pondo lalo na kung lumala ang sitwasyon.
“Yes po. We need the funding in a worst-case scenario. We can live with the current budget, with the current level of repatriation requests. However, ‘yung tanong ‘na, ‘Kapag worst-case scenario, kakayanin ba?’ also depends on pagpaparami ng repatriation requests antimano pa lang para makalabas na ‘yung sinong gustong makalabas at maging efficient tayo,” ani Cacdac.
“But the short answer is yes, (we need) supplemental funding,” dagdag pa niya.
Sinabi naman ni Patricia Yvonne Caunan, administrator ng Overseas Workers Welfare Administration (OWWA), na nasa P1.5 bilyon ang kasalukuyang Emergency Repatriation Fund.
Bago magsimula ang krisis, umaabot sa P135,000 hanggang P140,000 ang gastos sa repatriation kada indibidwal, ngunit maaaring umabot sa P150,000 dahil sa patuloy na tensyon.
Ayon kay Caunan, batay sa datos ng Department of Foreign Affairs, may humigit-kumulang 2.4 milyong Pilipino sa Gitnang Silangan.
“Nasabi po ng DFA (Department of Foreign Affairs) ‘yung number of Filipinos ay 2.4 million. ‘Pag nag-run po kami ng simulation ng at least 0.5% ang affected or around 12,000 na magre-request ng repatriation po, mayroon po kaming funding gap na agad na P338 million,” ani Caunan.
“So sabihin po natin at 1% ang mag-request, that would be around 24,000, Mr. Chair. Ang amin pong funding gap ay nasa P2.2 billion na po, so because the total estimated cost will be around P3.67 billion at P150,000 po,” dagdag pa niya.
Sinabi ni Sherwin Gatchalian, chairman ng Senate Committee on Finance, na kung aabot sa 93,000 Pilipino ang kailangang iuwi mula sa Gitnang Silangan, maaaring umabot sa P13 bilyon ang kakailanganing supplemental budget.
“I’m thinking of the worst kasi I’ve been listening earlier, magfa-file ng supplemental budget. Ito rin ang hihingiin later on ‘di ba,” ani Gatchalian.
Sumang-ayon naman si Cacdac sa pagtatayang ito.
“Yes po. Mr. Senator, we have to know the terrain. We have to know the people whom we will expect to cover. So yes, I would accept the figure,” aniya.
Samantala, sinabi ng Department of Finance na makikipag-ugnayan ito sa Department of Budget and Management upang pag-aralan ang posibilidad ng supplemental budget.
Ayon kay DOF Undersecretary Maria Edita Tan, tinitingnan ng pamahalaan ang paggamit ng contingent funds at posibleng savings upang matustusan ang repatriation efforts. RNT
