MANILA, Philippines – Binalaan ng Department of Health (DOH) nitong Miyerkules, Mayo 29 ang publiko laban sa paggamit ng electronic cigarettes (e-cigarettes) at iba pang vape products ay nagdudulot ito ng severe health risks, na binanggit ang kamakailang medical case report.
Iginiit ni DOH Secretary Teodoro Herbosa na ang E-cigarette at vaping ay hindi ligtas na alternatibo sa paninigarilyo.
Sa pagbanggit sa kaso na idinukomento ni Dr. Margarita Isabel Fernandez at nailathala sa Respirology Case Reports Journal, hinikayat ni Herbosa ang mga kabataan na huwag maniwala sa pekeng advertisement na nagsasabing mas ligtas na smoking alternative ang vaping.
Sa ulat ng kaso, tinalakay ni Fernandez ang kalagayan ng isang 22-anyos na lalaking Filipino na walang naunang isyu sa kalusugan.
Inatake sa puso ang pasyente, kasunod ng matinding pinsala sa baga na posibleng maiugnay sa kanyang pang-araw-araw na paggamit ng vape.
Ang pasyenteng dumaranas ng matinding pananakit ng dibdib, hirap sa paghinga at nakaranas ng atake sa puso dulot ng pagbabara sa kanyang dalawang pangunahing ugat ay na-admit sa isang ospital.
Sinabi ni Fernandez na ang pasyente ay nagkaroon ng malubhang kondisyon sa baga na kilala bilang e-cigarette o vaping-use associated lung injury (EVALI).
Ang karagdagang pagsusuri ay nagpakita ng malubhang sintomas tulad ng pulmonya sa baga, ngunit walang nakitang impeksyon.
Nagsagawa ang mga doktor ng emergency procedure para buksan ang naka-block na arterya sa puso, ngunit lumala ang kondisyon ng pasyente.
Ang pasyente ay nagkaroon ng respiratory failure, na nangangailangan ng mekanikal na bentilasyon, at namatay tatlong araw pagkatapos ng admission.
Binibigyang-diin ng case report ang mga panganib na dulot ng mga e-cigarette at mga produktong vape lalo na sa mga kabataan, kahit na ipinapakita ng mga internasyonal at lokal na pag-aaral na ang paggamit ng mga ito ay maaaring magdulot ng malaking pinsala sa maraming sistema ng katawan, na humahantong sa mga kondisyon tulad ng atake sa puso at EVALI.
Hinimok naman ni Herbosa ang mga kabataan na gumawa ng matalinong mga desisyon upang maprotektahan ang kanilang kalusugan.
“The DOH remains committed to educating the public about the dangers of vaping, and advocating for stricter regulations on these harmful products,” sabi ng kalihim.
Noong Marso, humingi ng tulong si Herbosa sa Pambansang Pulisya ng Pilipinas na tiyaking mahigpit na ipinatutupad ang partikular na probisyon ng Republic Act (RA) 11900 kaugnay sa pagbabawal sa pagbebenta ng vape sa mga taong wala pang 18 taong gulang.
Pinaigting din ng Department of Education ang pagsisikap na wakasan ang vaping sa loob ng mga paaralan. Ipinagbawal din nito ang pagbebenta at pag-promote ng produkto sa loob ng 100 metrong radius ng paaralan. Jocelyn Tabangcura-Domenden
