MANILA, Philippines — Pinaalala ng Department of Labor and Employment (DOLE) sa mga employer sa pribadong sektor na dapat bayaran ang kanilang mga empleyado ng 13th month pay bago mag-Disyembre 24, ayon sa opisyal nitong Martes.
Ayon kay Director Alvin Curada ng DOLE-Bureau of Working Conditions (BWC), ang mandatoryong benepisyo, na katumbas ng 1/12 ng taunang basic salary ng isang manggagawa, ay para sa lahat ng rank-and-file employees, kahit ano pa ang posisyon, employment status, o paraan ng pagtanggap ng sahod.
Saklaw nito ang mga nasa maternity leave, nag-resign, na-terminate, may maraming employer, o bayad sa piece-rate o kombinasyon ng sahod at komisyon.
Ipinaliwanag ni Curada na hindi saklaw ang mga nagtatrabaho sa personal service ng iba o ang kumikita lamang sa komisyon.
Karaniwan nang binabayaran ng ilang kumpanya ang 13th month nang mas maaga, minsan sa dalawang bahagi, ngunit ang legal na deadline ay Disyembre 24. RNT
