“Drayberks: Ready 4 Safety” Inilunsad ng MPTC

Bilang bahagi ng pagdiriwang ng Road Safety Month, inilunsad ng Metro Pacific Tollways South (MPT South) ang kanilang pinakabagong road safety advocacy campaign na pinamagatang “Drayberks: Ready 4 Safety”, na layong itaguyod ang ligtas na pagbiyahe sa mga pangunahing kalsada sa bansa.

Ginawa ang ceremonial launch sa Golden Phoenix Hotel sa Pasay City na dinaluhan ng mahigit 100 stakeholders mula sa pribado at pampublikong sektor. Katuwang sa aktibidad ang ilang ahensya ng pamahalaan tulad ng Department of Transportation (DOTr), Toll Regulatory Board (TRB), Land Transportation Office (LTO), Land Transportation Franchising and Regulatory Board (LTFRB), Metropolitan Manila Development Authority (MMDA), PNP Highway Patrol Group Region IV-A, Philippine Reclamation Authority (PRA), at PEA Tollway Corporation (PEATC).

Lumahok din ang ilang local government units (LGUs) mula sa Metro Manila at CALABARZON kabilang ang mga kinatawan mula sa Taguig, Parañaque, Pasay, Las Piñas, Bacoor, Imus, Kawit, General Trias, Dasmariñas, Silang, Santa Rosa, at Biñan.

Kabilang sa mga sumuporta sa programa ang mga transport at terminal partners gaya ng Parañaque Integrated Terminal Exchange (PITX), One Ayala Terminal, mga advocacy groups tulad ng ACTO, at mga bus companies gaya ng TAS Trans Corp., Erjohn & Almark Transit Corp., Don Aldrin Transport Inc., Saulog Transit, at Jasper Jean Services Inc.

Kasama rin sa mga dumalo ang mga grupong UV Express tulad ng DIPTA-MOA, United 12 Corp., TVTAP; at mga asosasyon ng modern at traditional jeepney gaya ng Paliparan 3, Kapit Bisig Transport, PABODA, CAMBIO, at Universal Transport. Nakiisa rin ang Philippine Multimodal Transport and Logistics Association Inc. bilang kinatawan ng logistics sector.

Sa kanyang welcome remarks, sinabi ni Metro Pacific Tollways Corporation (MPTC) President and CEO Jose Ma. K. Lim na mahalaga ang papel ng expressway operators hindi lamang sa imprastraktura kundi pati sa pagtataguyod ng road safety culture.

“This project is just one of the many ways MPTC demonstrates its unwavering commitment to the safety of all road users. We believe that true progress in road safety comes through collaboration—by working hand-in-hand with government, private partners, and the communities we serve,” ani Lim.

Pinangunahan ni Arlette V. Capistrano, MPT South Vice President for Communication and Stakeholder Management, ang opisyal na pagpapakilala ng kampanya.

“‘Ready 4 Safety’ strengthens our promise to equip every driver with the knowledge and values needed to navigate roads safely—not only for their own benefit, but for everyone’s,” pahayag ni Capistrano.

Bilang bahagi ng programa, nanumpa rin ang mga kalahok sa Drayberks Pledge na pinangunahan ni MPT South OIC Elnora D. Rumawak, bilang panata sa kanilang pakikiisa sa layunin ng kampanya. James I. Catapusan