MANILA, Philippines – Bilang pagpapatuloy ng mga pagsisikap na magbigay ng agarang at tuloy-tuloy na tulong sa mga Bicolano na apektado ng pag-aalboroto ng bulkang Mayon, ang Department of Social Welfare and Development (DSWD) ay naghatid ng mahigit Php117 milyong halaga ng tulong pang-humanitarian sa mga apektadong pamilya.
Sinabi ni Asst. Secretary Irene Dumlao ng Disaster Response Management Group (DRMG) ng DSWD sa isang panayam ng telebisyon noong Lunes (Mayo 4) na ang Kagawaran ay nagbigay ng pagkain at hindi pagkain na mga item, interbensyong psychosocial, cash-for-work (CFW), at emergency cash transfer (ECT) na tulong sa mga internally displaced persons (IDPs) na naninirahan malapit sa Bulkang Mayon.
“Iniutos ni Secretary Rex Gatchalian kahapon na dapat agad mapunan muli ang food packs na nailabas natin sa ating mga bodega kasi iyon ang utos ng Pangulong Ferdinand R. Marcos Jr. na tutukan natin ang Rehiyon ng Bicol at tiyakin na mayroon tayong sapat na mga resources na maaari nating ipamigay”
Para sa tulong-pinansyal, binanggit ng tagapagsalita ng DSWD na ang Kagawaran ay naglaan ng higit sa Php45 milyon sa mahigit 3,487 na magsasaka at Internally Displaced Persons (IDPs) na pansamantalang naapektuhan ang kabuhayan dahil sa pyroclastic activity ng Bulkang Mayon.
“Ang ginawa po kasi natin sa mga magsasaka na lumikas sa mga evacuation centers ay, maaari silang nagtanim sa mga bakanteng lote sa compound o nagpastol ng kanilang mga alagang hayop. Kaya doon sa trabahong ginagawa nila, nagbigay tayo ng tulong-pinansyal gamit muna ang cash-for-work. Ito ay upang matiyak na ang ating mga magsasaka ay patuloy na makakapaghanapbuhay,” diin ni Asst. Secretary Dumlao.
Kaugnay nito para sa ECT na tulong, sinabi ng tagapagsalita ng DSWD na ang tulong-pinansyal ay sasagutin ang iba pang agarang pangangailangan ng mga IDPs na hindi sakop ng pagkain at hindi pagkain na tulong.
“Ito naman pong emergency cash transfer, ito ay isang unconditional cash transfer na pino-provide naman po natin. Higit sa Php10,000 po ito kada pamilya, para po matulungan silang tustusan ang iba pang mga pangangailangan ng ating mga internally displaced persons. Alam naman natin na bukod sa pagkain, may iba pang mga food at non-food items na kailangan ng ating mga IDP tulad ng gamit, gatas ng mga bata, supplements at syempre iba pang pangangailangan,” sabi ni Asst. Secretary Dumlao.
Samantala sa kasalukuyan, ang DSWD ay nakikipagtulungan rin sa mga kinauukulang lokal na pamahalaan (LGUs) sa pagmamanman ng kalagayan ng 1,444 na pamilya o 5,459 na indibidwal na pansamantalang naninirahan sa 14 evacuation centers sa mga bayan ng Camalig at Malilipot, at sa mga lungsod ng Ligao at Tabaco, sa lalawigan ng Albay. (Santi Celario / larawan ni Eric Ocapan)
