MANILA, Philippines – Naghahanda ang Department of Social Welfare and Development (DSWD) para sa posibleng kakulangan sa tubig, food insecurity at matinding init dahil sa inaasahang epekto ng “very strong” El Niño sa mga susunod na buwan.
Ayon kay DSWD Assistant Secretary at spokesperson Irene Dumlao, nagpapatupad na ang ahensya ng mga hakbang sa ilalim ng Risk Resiliency Program-Climate Change Adaptation and Mitigation (RRP-CCAM), kabilang ang Project Local Adaptation to Water Access (LAWA) at Breaking Insufficiency through Nutritious Harvest for the Impoverished (BINHI).
“One of the measures being implemented by the DSWD is our Risk Resiliency Program-Climate Change Adaptation and Mitigation, which includes the Project Local Adaptation to Water Access (LAWA) and Breaking Insufficiency through Nutritious Harvest for the Impoverished (BINHI),” ani Dumlao.
Sinabi niyang nakatuon ang mga proyekto sa pagtiyak ng sapat na tubig at pagkain, habang tinutulungan ang mga komunidad na makapaghanda bago dumating ang mga climate hazard.
“We are focused on water access and water sufficiency, and of course, food security is also one of the concerns we are addressing. We do not only act when disasters occur. We also make sure to build the capacity of vulnerable sectors so they can prepare for and address their needs when other climate hazards affect their areas,” dagdag niya.
May 5,311 LAWA sites na ang DSWD sa buong bansa, kabilang ang mga farm reservoir, irrigation facility at rehabilitated waterways. Mayroon ding 8,671 BINHI sites na binubuo ng communal vegetable gardens at root crop farms.
Noong Setyembre 28, pinasinayaan ni DSWD Secretary Rex Gatchalian ang unang Atmospheric Water Generator (AWG) system na may hybrid power source sa Barangay Gilotongan, Cawayan, Masbate. Kumukuha ito ng moisture mula sa hangin at ginagawang maiinom na tubig para makatulong sa water shortage sa lugar.
Patuloy din ang temperature monitoring sa mga warehouse upang maiwasan ang pagkasira ng family food packs. Nag-i-install din ang DSWD ng industrial ceiling fans para mapanatili ang tamang temperatura sa imbakan.
Nakikipag-ugnayan din ang DSWD sa mga lokal na pamahalaan para sa heat-insulated areas sa evacuation centers upang maprotektahan ang mga internally displaced person laban sa matinding init.
Bukod dito, nagde-deploy ang ahensya ng water filtration trucks at iba pang teknolohiya upang matiyak ang ligtas na inuming tubig sa mga lugar na maaaring maapektuhan ng El Niño. RNT/MDS
