‘Dugo Alay sa Buhay’ bloodletting activity pinangunahan ng NPC

MANILA, Philippines – NASA higit 170 bag ng dugo ang naipon sa isinagawang “bloodletting activity” ng National Press Club of the Philippines (NPC) katuwang ang Philippine Red Cross (PRC) nitong Biyernes, Enero 17, 2025.

Ang naturang proyekto na may temang “Dugo Alay sa Buhay” ay sinimulan dakong alas-8 ng umaga sa ika-5 palapag ng NPC Building, Magallanes Drive, Intramuros, Maynila.

Ayon kay NPC President Leonel “Boying”Abasola, nakiisa sa nasabing proyekto at nag-alay ng kanilang dugo ang mga tauhan ng Philippine National Police, Philippine Coast Guard, Philippine Air Force, Philippine Navy, Bureau of Fire Protection, at Bureau of Jail Management and Penology.

Layon ng nasabing aktibidad na makatulong sa mga tao na kailangang masalinan ng dugo, partikular na ang mga miyembro ng mga mamamahayag, upang madugtungan ang kanilang buhay sa oras ng kanilang pangangailangan.

Kasama ni Abasola sa nag-asikaso sa nasabing proyekto sina NPC Vice President Benny Antiporda, Treasurer Mina Navarro, Sec. Tina Maralit, Auditor Lydia Bueno, Directors Aya Yupangco, JR Reyes, Madz Dominguez at Benedict Abaygar.

Kaugnay nito, nagpasalamat nmaan ang Philippine Red Cross sa inisyatiba ng NPC na magkaroon ng proyektong blood donation dahil aminado aila na mababa ngayon ang kanilang suplay ng kanilang nakaimbak na dugo.

Sa paliwanag ni Dr. Gerald Valeriano ng PRC, sinabi nito na marami ang nangailangan ng dugo partikular na nitong nagdaang buwan ng Disyembre dahil tumaas ang kaso ng dengue kung saan maraming pasyente at ospital ang nangailangan ng platelets.

Aniya, kadalasan na mababa ang kanilang suplay ng dugo sa unang quarter ng taon gayundin sa panahon ng mga Holidays tulad ng Undas, Mahal na Araw, Pasko at Bagong Taon.

Sa kabila nito, tiniyak naman ng PRC na tuloy-tuloy ang isinasagawa nilang blood donation activity katuwang ang ilang ahensiya ng gobyerno at ilang mga pribadong sektor upang mapanatiling may suplay sila ng dugo at maihayid sa mga nangangailangan nito.

Ayon kay Dr. Valeriano, sa mga nais magdonate ng kanilang dugo ay maaaring magtungo sa kanilang sangay sa Port Area sa Maynila at sa PRC Mandaluyong na matatagpuan sa EDSA Boni Avenue, aimula alas-8 ng umaga hanggang alas-5 ng hapon. Bukas ang mga nasabing sangay mula Lunes hanggang Linggo gayundin tuwing Holidays.

Ang mga kwalipikadong magdonate ng dugo ay nasa edad 18 hanggang 59 taon gulang, nasa 50 kilo pataas ang timbang, may sapat na pahinga, malusog ang pangangatawan, tattoo at hikaw na hindi lalagpas ng isang taon, at dapat hindi umiinum ng mga gamot na pang maintenance.

Ayon naman kay Pang. Abasola, plano nitong muling magsagawa ng blood donation sa darating na Oktubre upang ipagpatuloy ang tulong at pagsagip sa buhay sa mga nangangailangan nito.

Nagpasalamat naman si Abasola sa mga sumuporta partikular na ang mga nag-donate ng kanilang dugo gayundin sa pamunuan ng PRC na katuwang nito at walang sawang sumusuporta sa NPC. JR Reyes