MANILA, Philippines — Nangako ang Chinese Embassy sa Maynila na paiigtingin ang mga hakbang upang maibalik sa tamang direksyon ang ugnayan ng China at Pilipinas kasunod ng pulong ni Chinese Ambassador Jing Quan at Senate Foreign Relations Committee chair Erwin Tulfo.
“The Chinese Embassy will continue to actively promote dialogue and exchanges, enhance mutual understanding and trust, and bring bilateral relations back on track at an early date. It is in the fundamental interests of both peoples,” ayon kay Embassy spokesperson Ji Lingpeng.
Nagpulong sina Jing at Tulfo noong Lunes matapos ang ilang linggong palitan ng maaanghang na pahayag sa pagitan ng embahada at mga opisyal ng pamahalaan, kabilang ang ilang senador, kaugnay ng isyu sa West Philippine Sea.
Inilarawan ni Ji ang pulong bilang “candid, constructive, and forward-looking,” at sinabi na inilahad ng embahador ang posisyon ng China hinggil sa ugnayang bilateral, sa isyu ng Taiwan, at sa South China Sea. Nagkasundo umano ang dalawang panig na “keep diplomatic channels open and continue political conversations.”
Binanggit din ang progreso sa negosasyon para sa Code of Conduct sa South China Sea at kinilala ang pangangailangang palakasin ang diyalogo ng dalawang coast guard. Nagkasundo rin ang magkabilang panig na isulong ang kooperasyon sa people-to-people exchanges, law enforcement, trade, at investment.
Nilinaw din ni Ji ang naunang pahayag ni Jing na “any conflict would inevitably harm the long-term relationship between the two neighboring countries,” at na mas mainam na “sit down for talks.”
“By saying that, the Ambassador was referring to handling maritime disputes through dialogue and consultation,” aniya.
“The context did not imply that the Chinese Embassy was initiating talks with specific Philippine legislators or trying to tone down the debate. Debate should proceed when necessary—truth becomes clearer through it,” dagdag pa niya.
Ang naunang palitan ng pahayag ay nagbunsod ng mga panukala sa Senado at Kamara na ideklarang persona non grata ang ilang opisyal ng Chinese Embassy. Dave Baluyot
