MAGUINDANAO DEL NORTE, Philippines – Sugatan ang isang empleyado ng bangko matapos pagbabarilin ng isang armadong lalaki na sakay ng motorsiklo sa Sultan Mastura, Maguindanao del Norte noong Miyerkules ng hapon.
Kinilala ng pulisya ang biktima na si Jeffry Imbang Jalbuna, 40, empleyado ng Cooperative Bank of Cotabato at residente ng President Quirino, Sultan Kudarat.
Batay sa paunang imbestigasyon, nangyari ang insidente habang nangongolekta ng bayad sa pautang si Jalbuna at iba pang empleyado ng bangko sa Barangay Macabiso. Dumating ang dalawang hindi pa nakikilalang lalaki na sakay ng motorsiklo, at agad siyang pinagbabaril ng back rider bago tumakas.
Agad na isinugod si Jalbuna sa Sanitarium Hospital sa Sultan Kudarat. Nagtamo siya ng dalawang tama ng bala—isa sa kanang bahagi ng balakang at isa sa kaliwang braso—at nasa matatag na kondisyon.
Patuloy pang iniimbestigahan ng pulisya ang motibo ng pamamaril. Nangyari ang insidente habang umiiral ang election gun ban sa buong Bangsamoro Autonomous Region in Muslim Mindanao (BARMM) bilang paghahanda sa parliamentary elections sa susunod na buwan. RNT/MDS
