ES Recto, ex-PhilHealth chief Ledesma kinasuhan ng pandarambong

MANILA, Philippines – Sinampahan ng kasong plunder at graft sa Office of the Ombudsman sina Executive Secretary Ralph G. Recto at dating Philippine Health Insurance Corporation (PhilHealth) president at chief executive officer na si Emmanuel R. Ledesma Jr. kaugnay ng paglipat ng P60 bilyong reserve funds ng PhilHealth sa National Treasury.

Inakusahan sina Recto, bilang dating kalihim ng pananalapi, at Ledesma ng kriminal na pananagutan sa paglipat ng tinatawag na excess o reserve funds ng PhilHealth. Bukod sa plunder sa ilalim ng Republic Act No. 7080, sinampahan din sila ng paglabag sa Republic Act No. 3019 o Anti-Graft and Corrupt Practices Act, Article 220 ng Revised Penal Code hinggil sa technical malversation, at grave misconduct sa ilalim ng Republic Act No. 6713.

Inihain ang mga reklamo noong Huwebes, Enero 15, ng ilang indibidwal kabilang ang mga doktor at pribadong mamamayan. Iginigiit ng mga nagreklamo ang naging desisyon ng Korte Suprema na nagdeklara ng grave abuse of discretion sa isang special provision ng 2024 General Appropriations Act (GAA) na nagpapahintulot sa pagbabalik ng excess o reserve funds ng mga government-owned or controlled corporations sa National Treasury.

Pinawalang-bisa ng Korte Suprema ang Special Provision 1(d), Chapter XLIII ng 2024 GAA at ang Department of Finance Circular No. 003-2024 na nag-utos ng paglilipat ng P89.9 bilyong pondo ng PhilHealth. Inatasan din ng Korte ang pagbabalik ng P60 bilyong nailipat na at tuluyang ipinahinto ang paglipat ng natitirang P29.9 bilyon.

Ayon sa mga nagreklamo, malinaw sa Republic Act No. 11223 o Universal Health Care Act na ang reserve funds ng PhilHealth ay dapat protektahan at ilagak sa mga interest-earning investments, at tahasang ipinagbabawal ang paglilipat nito sa National Treasury. Anila, nagdulot ng malaking pinsala sa PhilHealth at sa mga benepisyaryo nito ang ginawa nina Recto at Ledesma, na kalauna’y itinuring na “unconstitutional” ng Korte Suprema.

“Recto caused the inclusion of PhilHealth Reserve Funds in the GOCC excess funds through Special Provision Section 1 of the 2024 GAA,” ayon sa reklamo, at idinagdag na “Ledesma Jr… should also be held liable for his acquiescence to the directive given by respondent Recto.”

Hindi nakuhanan ng pahayag sina Recto at Ledesma hanggang sa oras ng paglalathala. Iginiit ng mga nagreklamo na “these funds were utilized not for the purpose for which they were appropriated,” at binigyang-diin, “It violates the existing laws. It is tantamount to amendment of existing laws.” Dagdag pa nila, “This one is for the universal healthcare and this one is for every Filipino who is unable or incapable or cannot afford na pumunta sa (to go to) hospital.” Santi Celario