MANILA, Philippines – Nagpapagaling na sa ospital ang estudyanteng sugatan sa nangyaring shooting incident sa loob ng paaralan sa Zamboanga City, ayon sa provincial disaster risk reduction and management office head nitong Miyerkules, Agosto 19.
“She’s confined in the hospital and she’s doing fine,” sinabi ni Elmer Apolinario, hepe ng Zamboanga City Provincial Disaster Risk Reduction and Management Office.
Dalawang estudyante ang nasawi kabilang ang shooter kasunod ng shooting incident sa Ateneo de Zamboanga University Junior High School nitong Martes.
Sa inisyal na impormasyon ay nagawang maipuslit ng shooter ang high-powered firearm at isang kalibre .45 na pistola.
Samantala, nagtamo naman ng mga pasa dahil sa komosyon ang 21 iba pang estudyante.
Sinuspinde ng Ateneo de Zamboanga University ang pasok sa lahat ng antas hanggang ngayon araw “to allow sufficient time to attend to the safety and well-being of our students and personnel.”
Idineklara rin ni Ateneo de Zamboanga University President Fr. Anthony “Ernald” Andal, SJ ang day of mourning and prayer.
Ayon kay Zamboanga City Mayor Khymer Adan Olaso, ang estudyanteng namaril ay nakakaranas umano ng pressure sa kanyang grade at nakaranas ng depression. RNT/JGC
