MANILA, Philippines- Pinangalanan ni Pangulong Ferdinand Marcos Jr. ang ex-broadcast journalist na si Jose Edwiniel “Joee” Guilas bilang miyembro ng kanyang economic team.
Inanunsyo ng Presidential Communications Office ang appointment ni Guilas bilang Undersecretary ng Office of the Special Assistant to the President for Investment and Economic Affairs.
Manunungkulan siya sa ilalim ni Frederick Go, Special Assistant for Investment and Economic Affairs ni Marcos.
Sa isang post sa kanyang opisyal na Facebook page, sinabi ni Guilas na magsisilbi siya bilang Undersecretary for Strategic Partnerships and Engagements ng Marcos administration.
“I always had it in my heart to serve the people through the government as a way of giving back to the taxpayers who gave me the means to finish my education. I am, after all, a product of the public school system,” ani Guilas.
Bago ang kanyang appointment, nanungkulan si Guilas bilang vice president at director ng Newport World Resorts, bukod sa senior executive roles niya sa ilang bangko. Dati rin siyang anchor ng People’s Television Network.
Gayundin, itinalaga ng Pangulo sina Greg Pua Jr. bilang executive director ng Land Transportation Office at Ermelita Valdeavilla bilang chairperson ng Philippine Commission on Women.
Nanumpa sina Pua at Valdeavilla sa harap ni Executive Secretary Lucas Bersamin nitong Biyernes ng hapon. RNT/SA
