MANILA, Philippines – Ibinunyag ni Senate President Pro Tempore Panfilo “Ping” Lacson na may “family business” umano si dating DPWH Secretary Manuel Bonoan kasama si Candaba Mayor Rene Maglanque, na aniya’y contractor sa multi-billion flood control projects.
Sa kanyang privilege speech, sinabi ni Lacson na si Maglanque—dating presidente ng Globalcrete Builders—ay nakakuha umano ng ₱2.195 bilyon na flood control contracts sa Bulacan mula 2018–2024.
“Si Mayor Rene Maglanque ang presidente noong 2024 na kung saan may mga kontrata na siya mismo ang pumipirma na dapat sana ay nagdivest siya,” wika ni Lacson.
Dagdag niya, pag-aari rin ni Maglanque ang MBB Global Properties Corp. na nagpatayo ng halos ₱1 bilyon na Wyndham Garden Hotel sa Clark.
Batay sa 2024 GIS ng MBB, tinukoy niya ang mga opisyal nitong sina Macy Monique Maglanque (President), Sunshine M. Bernardo (Corporate Secretary), at Fatima Gay B. (Bonoan) Dela Cruz (Treasurer)—na mga anak nina Mayor Maglanque, DPWH Undersecretary Roberto Bernardo, at Manuel Bonoan.
Aniya, ang MBB ay nangangahulugang Maglanque, Bernardo, Bonoan.
“Kayo na po ang mag-connect the dots,” dagdag pa niya, at sinabing “Kaya naman pala ang palaging depensa ni dating DPWH secretary Bonoan, isolated case lang daw ang nakita ni Pangulong Bongbong Marcos na ghost project sa Bulacan. Ayaw na siguro ni Bonoan na maungkat pa sa imbestigasyon ang Globalcrete.”
Nauna nang inanunsyo ng Malacañang ang pagbibitiw ni Bonoan sa DPWH; pinalitan siya ni Vince Dizon. RNT
