MANILA, Philippines – Itinalaga ni Pangulong Ferdinand R. Marcos Jr. si dating Supreme Court spokesperson Brian Keith Hosaka bilang executive director ng Independent Commission for Infrastructure (ICI).
Ayon sa Presidential Communications Office, nilagdaan ang appointment paper ni Hosaka noong Setyembre 24. Noong Setyembre 11, nilagdaan din ni Marcos ang Executive Order 94 na lumikha sa ICI bilang fact-finding body na susuri sa mga alegasyon ng korapsyon at maling paggamit ng pondo sa flood control at kaugnay na proyekto.
Pinamumunuan ang ICI ni retired SC Justice Andres Reyes Jr., kasama sina dating DPWH Secretary Rogelio Singson at SGV executive Rossana Fajardo. Ang executive director ang mangunguna sa ICI Secretariat na may ranggong undersecretary.
Si Hosaka ay nagsilbi ring commissioner ng Governance Commission for GOCCs, assistant court administrator, at PIO chief ng Korte Suprema. Naging law clerk din siya ni Justice Josue Bellosillo at co-founder ng Paner Hosaka & Ypil Law. RNT
