MANILA, Philippines – Inalis ng House prosecution panel si dating Department of Education (DepEd) special disbursing officer Edward Fajarda bilang testigo sa impeachment trial ni Vice President Sara Duterte habang nagpapagaling ito mula sa stroke.
Dapat sanang tumestigo si Fajarda noong huling bahagi ng Agosto kaugnay ng Article I, o alegasyon ng maling paggamit ng confidential funds (CF) sa DepEd noong kalihim pa nito si Duterte. Ngunit ipinagpaliban ito matapos siyang ma-stroke.
Ginawa muna siyang reserved witness matapos irekomenda ng kanyang doktor ang dalawang linggong pahinga. Ngunit nitong Lunes, sinabi ng kanyang abogado sa Senate Impeachment Court na kailangan pa niya ng isang buwan upang tuluyang gumaling.
“In view of the latest medical update, and the confirmation by the doctors of the Senate, as a humanitarian consideration, we are going to dispense with the testimony of the witness, and we wish him well,” ani private prosecutor Reynaldo Robles.
Dahil dito, binawi ng prosecution ang subpoena kay Fajarda at sa halip ay itinuloy ang mga stipulation o mga bagay na napagkasunduan ng magkabilang panig.
Nauna nang sumang-ayon ang depensa na si Col. Dennis Nolasco, security officer ni Duterte, ang tumanggap mula kay Fajarda ng P112.5 milyon DepEd confidential funds, alinsunod umano sa utos ni Duterte noong siya ang education secretary mula 2022 hanggang 2024. RNT/MDS
