BILANG bahagi ng pagdiriwang sa ika-123 Philippine Civil Service Anniversary (PCSA), ang lahat ng mga opisyal at empleyado ng gobyerno ay maaaring mag-avail ng mga special treat at discount sa kanilang mga bibilhin, accomodations, at mga aktibidad ngayong buwan ng Setyembre.
Inanunsiyo ni Civil Service Commission (CSC) Chairperson Karlo Nograles na nakipagtulungan sila sa iba’t ibang pribadong establisyimento para mag-alok ng eksklusibong rates at freebies para sa 1.9 milyong aktibong lingkod-bayan pati na rin sa mga retiradong empleyado bilang pagkilala sa kanilang pagsusumikap at pangako sa serbisyo publiko.
“Inihanda natin itong special treats bilang pasasalamat sa ating mga kawani. Talaga namang hindi matatawaran ang inyong mga sakripisyo upang matugunan ang pangangailangan at mabigyan ng dekalidad na serbisyo ang publiko anumang oras. Salamat po sa inyo,” ani Chairperson Nograles.
Para sa buong buwan ng Setyembre, ang mga empleyado ng gobyerno ay maaaring mag-avail ng mga diskwento mula sa pampubliko at pribadong sektor na kasosyo sa mga akomodasyon, amusement facilities, food orders, health and wellness facilities, mga retail outlet, service provider, at mga travel agencies.
Nabatid sa CSC na ang mga sumusunod ay ang mga kasosyong outlet na nag-aalok ng mga diskwento sa mga akomodasyon: Bluewater Maribago (Lapu-Lapu City, Cebu); Casa Emilia (Caloocan City); Desert Rose Hotel (El Nido, Palawan); Fulgueras Beach Resort (San Felipe, Zambales); Department of Tourism – Cordillera Administrative Region; Department of Tourism – Region 1; Harolds Evotel Hotel Cebu; Kwentong Dagat (San Felipe, Zambales); Layang Layang Home (El Nido, Palawan); Limliwa Beach Resort (San Felipe, Zambales); RedDoorz; Seda Lio (El Nido, Palawan); Sitio de Amor (San Pablo City, Laguna); Urbiz Garden (San Juan, La Union); at Villa Pamana Inn (Puerto Galera, Oriental Mindoro).
Mae-enjoy din ng mga civil servant ang discounted rates sa SM Bowling, SM Skating, Game Room, at Star City. Bukod pa rito, pinalawig ni Ka Tunying ang espesyal na pagpepresyo para sa mga order na pagkain.
Samantala, ang mga sumusunod ay ang listahan ng mga health and wellness facility na nakipagtulungan sa CSC: 2 Hands; Asian Eye Institute; EyeSite by Asian Eye Institute; Blissful Bali Massage Spa and Aesthetic Center; Dermcare; Executive Optical; KR Suarez Optical; Pink Parlour; RCC Amazing Touch; at Vitasurg Clinic.
Mayroon ding siyam na retail outlet na nag-aalok ng mga diskwento sa mga purchases in-store tulad sa ACE Hardware; FlexiSpot; Hi-Q Appliances; Miniso; Pet Express; SM Appliance Center; SM Store; Toy Kingdom; at Trax Manila Records.
Ang mga empleyado ng gobyerno at mga retiradong tauhan ay maaaring makakuha ng mga diskwento sa mga serbisyo mula sa AutoGenic, Automobile Association Philippines, L&D’s Auto Body Painting & Repair Services, at Majesty Driving School. Panghuli, ang Bigson Travel & Tours at Travbest Travel & Tours Co. nag-aalok din ng mga diskwento sa mga travel bookings at travel insurance.
Upang mapakinabangan ang mga diskwento, kailangang ipakita ng mga empleyado ng gobyerno ang kanilang government agency ID o UMID card. Ang Job Order at Contract of Service workers ay maaari ding maka-avail ng mga special treat sa pamamagitan ng pagpapakita ng kanilang opisyal na ID card ng ahensya ng gobyerno.
Para sa karagdagang impormasyon, bisitahin ang www.csc.gov.ph/pcsa2023 o sa pamamagitan ng CSC Facebook Page sa www.facebook.com/civilservicegovph.
Ang taunang pagdiriwang ng PCSA ay bilang paggunita sa paglagda ng Public Law No. 5, o “An Act for the Establishment and Maintenance of an Efficient and Honest Civil Service in the Philippine Islands” noong Setyembre 19, 1900.
Ang pagdiriwang ay alinsunod din sa Presidential Proclamation No. 1050, serye ng 1997 na nilagdaan ng yumaong Pangulong Fidel Valdez Ramos na nagdedeklara sa buwan ng Setyembre bilang Civil Service Month.
Kabilang sa iba pang aktibidad na nakahanay para sa 123rd PCSA ang 2023 Public Sector Human Resource Symposium, 2023 Awards Rites for Outstanding Government Employees, Government Online Career Fair, Online Zumba at Film Showing, Plant-Run, Golf for a Cause, Virtual Recognition Program for Contact People’s Center Partner Agencies, at PRIME HRM Awards.
Para sa karagdagang impormasyon tungkol sa 123rd PCSA, bisitahin ang www.csc.gov.ph/pcsa2023 o sundan ang CSC Facebook Page sa www.facebook.com/civilservicegovph para sa mga update. RNT
