MANILA, Philippines – Mahigpit na iimbestigahan ng Quezon City Police District (QCPD) ang viral na ‘gas-and-run’ incident sangkot ang isang motorista na tumakas matapos magpa-full tank sa isang gasolinahan sa Quezon City.
Iniulat ng QCPD na ang insidente ay itinuturing na kaso ng estafa na nangyari noong Marso 22 sa gasolinahan sa Barangay Apolonio Samson.
Ayon sa pump attendant ay umabot sa P5,196.45 ang bill ng full tank ng diesel ng isang puting Toyota Innova na agad tumakas patungo sa EDSA.
Nagsagawa na ng ocular inspection ang mga tauhan ng La Loma Police Station at sinuri ang mga CCTV footage sa lugar.
Bumuo na rin ng Special Investigation Team ang mga awtoridad para matukoy at matunton ang registered owner ng sasakyan.
“The QCPD is taking this matter seriously and calls on anyone with information regarding the identity or whereabouts of the vehicle owner to report immediately to the nearest police station or dial E911/QC Helpline 122,” dagdag pa.
Nanawagan ang pulisya sa drayber na sumuko na dahil kalaunan ay matutunton din ito. RNT/JGC
