MANILA, Philippines – Hindi maaaring maglunsad ang National Security Council (NSC) ng sariling imbestigasyon kaugnay sa umano’y “gentleman’s agreement” sangkot ang dating administrasyon at ng pamahalaan ng China kaugnay sa resupply missions sa Ayungin Shoal sa West Philippine Sea.
Ani NSC assistant director general Jonathan Malaya nitong Martes, Mayo 7, hindi nila ito maaaring imbestigahan dahil ang isyu ay may kaugnayan sa dating administrasyon, at siya kasama si National Security Adviser Eduardo Año ay naitalaga lamang sa ahensya noong nakaraang taon.
“Mahirap sa amin sa NSC na mag-imbestiga dito dahil ito ay may kinalaman sa nakaraang administrasyon. Kami ay naupo lang naman dito last year noong naitalaga si National Security Adviser Eduardo Año as National Security Adviser. So, hindi kami puwedeng mag-imbestiga nito,” sinabi ni Malaya.
Nagsilbing kalihim ng Department of Interior and Local Government (DILG) si Año sa panahon ng Duterte administration.
Bago rito, siya rin ay chief of staff ng Armed Forces of the Philippines mula Disyembre 2016 hanggang Oktubre 2017.
Samantala, si Malaya naman ay itinalaga bilang undersecretary ng DILG sa Duterte administration.
“Karapatan naman ‘yan ng lehislatura ng Kongreso kung gusto nilang mag-imbestiga as an equal branch of government,” ani Malaya.
Matatandaan na lumitaw ang “gentleman’s agreement” mula mismo kay dating presidential spokesperson Harry Roque, kung saan nakipagkasundo umano si Duterte sa Beijing na tanging pagkain at tubig lamang ang maaaring ihatid ng Pilipinas sa tropang Pinoy sa BRP Sierra Madre sa Ayungin Shoal. RNT/JGC
