MANILA, Philippines – Hindi magtatapos sa flood control projects ang imbestigasyon ng Senado hinggil sa ghost projects na kinulimbat ng ilang private contractor kasabwat ang mga pulitiko sa Kongreso, dahil isasama na rin sa susuriin ang mas marami pang proyekto ng Department of Public Works and Highways (DPWH).
Ayon kay Senador Juan Miguel Zubiri, sasakupin din ng imbestigasyon ang paglalagay ng rock netting sa mga mapanganib na lugar na madalas gumuho ang lupa, dredging ng ilog, paglalagay ng cat’s eye sa lansangan, pagtatayo ng solar lamp sa highway, at lahat ng by-pass roads, multi-purpose buildings, at iba pang proyektong pangkalsada sa buong bansa.
“Flood control pa lang itong naiimbestigahan ngayon, at sigurado akong marami pang anomalya sa ibang infrastructure projects gaya ng notorious na rock netting projects na wala namang silbi, mga solar lamps, cat’s eye, multi-purpose buildings, road projects, at ‘yung dredging projects na hindi naman natin malaman kung nagawa ba o hindi,” ayon kay Zubiri.
Binigyang-diin pa ng senador ang insidente sa Albay kung saan bumagsak ang isang stage roof na bagong gawa pa lamang at natumba agad matapos tamaan ng ulan. “Bagong gawa lang po ito, pero bumigay agad, natamaan lang ng ulan—hindi pa nga ito bagyo,” aniya.
“Dapat imbestigahan na lahat ng infrastructure projects, hindi lang flood control. It is very possible that the funds pocketed through these ghost and substandard projects have now exceeded the misappropriations under the pork barrel scam,” giit ni Zubiri.
Dagdag pa niya: “This is why all the contractors and government officials behind these anomalous projects must face plunder, graft and corruption, and syndicated estafa charges—non-bailable offenses that will ensure that they do not escape jail time. If investigations reveal forgery, they should also be filed with falsification of public documents, under the Revised Penal Code.”
Sinabi rin ni Zubiri na hawak ng mga taong sangkot sa ghost projects ang “dirty money,” kabilang ang private contractors at mga kasabwat na pulitiko sa Kongreso, partikular sa Bulacan — ang lalawigan ni Senador Joel Villanueva kung saan umano marami ring ghost projects.
Naunang itinanggi ni Villanueva na may kakilala siyang opisyal ng DPWH, ngunit pagkatapos ng kanyang privilege speech sa Senado ay kumalat sa social media ang video na siya mismo ang nagpakilala kay DPWH District Engineer Henry Alcantara sa isang event sa Bocaue — isa sa mga itinuturong sangkot sa anomalya.
“These people have dirty money. Barya lang sa kanila ang magpiyansa, kaya dapat siguraduhin natin na non-bailable ang mga kasong ipapataw sa kanila. Let them rot in jail,” ayon kay Zubiri.
“I have brought this up to Sen. Ping Lacson, and he agreed and added that these individuals have to be charged with predicate crimes that penalize them with reclusion perpetua. This is the least that they deserve for pocketing taxpayers’ money,” dagdag pa niya. Ernie Reyes
