MANILA, Philippines – ISINASAGAWA na ang paghahanda para sa potensiyal na epekto ng southwest monsoon (habagat), na maaaring makasabay ng Super El Niño.
Ito’y sa kabila, ani Presidential Communications Office (PCO) Undersecretary at Palace Press Officer Claire Castro, ng hindi kayang kontrolin ang pagpasok ng bagyo at ang pagragasa ng tubig-ulan na aniya’y tinatawag na force majeure o fortuitous event, unforeseeable o namo-monitor man.
“Pero pinaghahandaan,” ang binigyang-diin ni Castro.
Sa katunayan, aniya, ay nakausap mismo si MMDA Chairman Don Artes ukol sa bagay na ito at ang sinabi aniya sa kanya ni Artes ay, “Tuloy-tuloy ang bayanihan sa estero. Kasama dito ang paglinis ng drainage. Katulong din ng MMDA ang DepEd para sa Brigada Eskwela, particularly ang pagre-repair ng mga classroom, pagsasagawa ng anti-dengue misting, pruning of trees and cleaning.”
Kaya nga aniya, nananawagan ang Malakanyang sa publiko na magtulong-tulong sa paglilinis ng estero. Hindi aniya dapat na ipaubaya na lamang ng tao sa gobyerno ang paglilinis ng estero.
“Tayo pong lahat ay makakatulong para maiwasan din po natin ang pagbaha,” ang sinabi ni Castro.
Winika pa ni Castro na bago umalis si Pangulong Ferdinand Marcos Jr. para sa Japan, nagpatawag muna ito ng pagpupulong para sa El Niño action plan. Nakapaloob dito ang water, food at energy security, health protection, at public safety.
Aniya pa, muli namang pagaganahin ng Department of Agriculture (DA), National Food Authority (NFA), at Bureau of Fisheries and Aquatic Resources (BFAR) ang National El Niño Task Force.
“So, aking pong babanggitin ang ilan sa mga action plan na gagawin po. DA, NFA, PCA and BFAR reactivate the National El Niño Team, map drought-prone areas, provide crop measures through PCIC, repair and rehabilitate irrigation and water harvesting systems, promote alternate wetting and drying technology. Ilan lamang po ito sa mga plano,” ani Castro.
“Para naman sa DENR, MWSS, Regional Office, LWUA, NWRB and NIA, monitor reservoir and repair facilities, continue water conservation measures, deploy water tanks and treatment units and prioritize domestic water supply. At para sa DOH, FDA and RHUs, intensify disease surveillance, preposition medical supplies, monitor heat and water-related illnesses like heat stroke, dehydration, waterborne diseases,” aniya pa rin.
“At para sa DOE, NPC, NGCP, NEA, ensure adequate energy supply and fuel reserves, support transmission project implementation and ensure backup power for critical infrastructure. So, ilan lamang po ito sa mga napag-usapan at marami pa pong mga action plans na ipatutupad dahil inaasahan po na magkakaroon tayo ng El Niño mga bandang July o siguro katapusan ng June o July,” dagdag na pahayag ni Castro. (Kris Jose)
