MANILA, Philippines – Humarap si dating Senate finance committee chair Grace Poe sa Independent Commission for Infrastructure (ICI) nitong Martes at itinanggi ang anumang partisipasyon sa tinatawag na “small committees” kung saan umano nagkaroon ng budget insertions.
“I am not privy to that, wala akong sinalihan na small committee o closed-door meeting with my counterpart in the House,” ani Poe.
Ipinaliwanag niya na ang mga amendments mula sa dalawang kapulungan ay nire-reconcile sa bicameral conference committee kasama ang Department of Budget and Management (DBM). “Lahat ng amendments ay na-ratify ng parehong kapulungan at iniharap sa DBM para masigurong pasok sa mga kategoryang maaaring baguhin,” dagdag niya.
Dumating ang kanyang pagdalo matapos humarap sa ICI sina Senate President Vicente “Tito” Sotto III at Senador Panfilo Lacson, na kapwa nagsabing “illegal” ang mga insertions pagkatapos ng bicam at tinawag itong “original sin” ng budget process. RNT
