BACOLOD CITY – Pinagsasaksak hanggang sa mapatay ang isang Grade 12 student dahil sa umano’y pagpapakalat ng sex video ng isang babaeng estudyante sa Barangay 4, Hinigaran, Negros Occidental noong Linggo ng gabi, Agosto 18.
Sinabi ni Police Lt. Col. Eduardo Corpuz, hepe ng Hinigaran police, ang 17-anyos na biktima ay pinagsasaksak ng dalawang hindi pa nakikilalang tao na dumating sakay ng motorsiklo habang nakaupo sa isang bangko ilang metro ang layo mula sa kanilang bahay malapit sa highway.
Nagtamo ang biktima ng dalawang saksak sa dibdib, at tig-iisa sa leeg, kaliwang braso, kanang tuhod, at kanang bukung-bukong.
Sinabi ni Corpuz na nakauwi ang biktima at humingi ng tulong sa kanyang pamilya. Dinala siya sa ospital kung saan idineklara siyang patay.
Tinitingnan ng pulisya ang paghihiganti bilang posibleng motibo sa insidente dahil ang biktima ay inakusahan ng pagkalat ng sex video.
Aniya, nakakuha sila ng closed circuit television camera footage ng insidente at naghahanap ng mga testigo na makatutukoy sa mga suspek. RNT
