CEBU CITY – Namatay ang 55-anyos na lalaki na nagtamo ng matinding paso sa walang saysay na pagtatangkang iligtas ang kanyang dalawang anak mula sa kanilang nasusunog na bahay sa Tagbilaran City, Bohol.
Namatay noong Sabado, Agosto 17, habang ginagamot sa Gov Celestino Gallares Medical Center sa Tagbilaran si Edgardo Lasco Sr.
Nagtamo ng mga paso si Lasco matapos tangkaing iligtas ang kanyang mga anak mula sa kanilang bahay na nasunog noong Agosto 14.
Tulog ang kanyang tatlong taong gulang na anak at isang taong gulang na anak nang sumiklab ang sunog. Nabigo silang mailigtas ng kanilang ama dahil mabilis na kumalat ang apoy.
Tinamaan ng apoy ang dalawa pang bahay bago ito naapula.
Sinabi ni Police Lt. Col. John Kreen Escober, hepe ng Tagbilaran City police station, hindi pa matukoy ang sanhi ng sunog dahil nabigo si Lasco na makausap ang mga imbestigador dahil sa kanyang matinding pinsala.
Hindi nagtagal at nasunog ang bahay dahil gawa ito sa mga light materials, sabi ng pulisya.
Sinabi ng pulisya na dumating noong Sabado ang asawa ni Lasco na nagtatrabaho sa Maynila.
