MANILA, Philippines – Malaking bahagi ng bansa ang patuloy na makakaranas ng mga pag-ulan dulot ng umiiral na habagat, ayon sa weather bureau nitong Lunes.
Sa kanilang 5 a.m. weather bulletin, sinabi ng Philippine Atmospheric, Geophysical and Astronomical Services Administrarion (PAGASA) na ang habagat ay magdadala ng mga pag-ulan sa mga lalawigan ng Zambales, Bataan at Occidental Mindoro.
Pana-panahong pag-ulan ang iiral sa Metro Manila, Ilocos Region, Benguet, Tarlac, Pampanga, Bulacan, Cavite, Laguna, Batangas, Rizal, at Oriental Mindoro.
Ang Visayas, nalalabing bahagi ng Luzon, Zamboanga Peninsula, at Northern Mindanao ay makakaranas ng kalat-kalat na pag-ulan at pagkidlat-pagkulog.
Katamtaman hanggang malakas na pag-ulan sa mga lugar na ito ay maaaring magresulta sa flash flood o landslide.
Sinabi ni PAGASA forecaster Daniel Villamil na ang natitirang bahagi ng Mindanao ay makararanas ng maaliwalas na panahon na may isolated rain showers o thunderstorms dulot pa rin ng habagat.
Katamtaman hanggang sa malakas na hangin at katamtaman hanggang sa maalon na tubig sa baybayin ang inaasahan sa buong Luzon.
Sa ibang lugar, ang hangin ay magiging mahina hanggang sa katamtaman na may banayad hanggang sa katamtamang pag-alon ng karagatan.
Samantala, sinabi ni Villamil na isang low pressure area (LPA) ang binabantayan sa loob ng Philippine Area of Responsibility (PAR) at nasa layong 1,140 km. silangan ng timog-silangang Luzon noong 3 a.m.
“It has a slim chance of developing into a tropical cyclone in the next 24 hours, and is also unlikely to have a direct effect on any part of the country since it is too far,” sabi ni Villamil. RNT/MND
