BAGUIO CITY, Philippines – Iniulat ng Department of Education sa Cordillera Administrative Region (DepEd-CAR) na 1,620 silid-aralan sa buong rehiyon ang nasira ng Super Typhoon Uwan, kasama ang iba’t ibang pasilidad at kagamitan sa paaralan.
Ayon sa ulat, 1,170 silid-aralan ang nagtamo ng kaunting pinsala, 328 ang nasira, at 122 ang ganap na nawasak.
Kabilang sa iba pang naitalang pagkalugi ang 143 nasirang washing at sanitation facility, 292 ancillary facility, 1,669 sirang upuan, 10,693 sirang learning materials, at 564 sirang information technology equipment.
Dagdag pa, 31 paaralan din ang nakaranas ng pagguho ng lupa o pagbaha.
Ang mga paaralan na hindi pa ligtas para sa mga harapang klase ay lumipat sa mga alternatibong mode ng pag-aaral, katulad ng ginamit noong pandemya ng Covid-19, kabilang ang mga modular, online, o hybrid system.
Kasalukuyang nagsasagawa ng on-site validation at assessment ang mga inhinyero ng Disaster Risk Reduction and Management Council (DRRMC) ng DepEd sa mga pinsala sa mga pasilidad at logistik ng paaralan.
Samantala, ang Benguet Electric Cooperative (Beneco) ay nag-ulat ng PHP10.1 milyon ang pinsala sa mga substation, poste, linya ng kuryente, transformer, at protective device nito. RNT/MND
