Higit 100,000 deboto nakiisa sa Misa Mayor

MANILA, philippines – Mahigit 100,000 Katolikong mananampalataya at deboto ng Poong Jesus Nazareno ang dumalo sa Misa Mayor o midnight Mass sa Quirino Grandstand bago ang Traslacion 2026, ayon sa Manila Public Information Office (PIO).

Batay sa isang Facebook post ng Manila PIO, ang crowd estimate ay mula sa datos ng Manila Police District (MPD) at ng Innovation Integrated GIS and Data Hub ng Manila Disaster Risk Reduction and Management Office (DRRMO).

Ayon sa Manila PIO, dakong alas-5:05 ng umaga ay nasa kahabaan na ng Padre Burgos Avenue patungong Finance Road ang andas na kargado ang imahen ng Poong Jesus Nazareno.

Umalis ang andas sa Quirino Grandstand dakong alas-4 ng umaga, hudyat ng opisyal na pagsisimula ng Traslacion, isa sa mga pangunahing aktibidad ng Kapistahan ng Poong Nazareno na karaniwang dinadaluhan ng milyon-milyong deboto. RNT