Higit 400 nalambat sa ‘POGO scam hub’ sa Pasay

MANILA, Philippines- Nadakip ng mga awtoridad ang 401 foreign workers ng umano’y Philippine offshore gaming operator (POGO) scam hub na nagsasagawa ng operasyon sa isang 10-storey building malapit sa Macapagal Boulevard sa Pasay City nitong Miyerkules.

Pinangunahan ng mga lokal na awtoridad mula sa Pasay City government ang raid kasama ang mga operatiba mula sa Philippine National Police-Criminal Investigation and Detection Group (PNP-CIDG), Department of Justice Office of Cybercrime (DOJ-OOC) at sa Presidential Anti-Organized Crime Commission (PAOCC) matapos makatanggap ng ulat na nagsasagawa ng POGO operation sa gusali.

“We received an intelligence report na mayroong nag-o-operate ng POGO dito. Last year, may pinasara na kami dito sa 6th floor and alam ko sa 8th floor na POGO,” pahayag ni Pasay Business Permits and Licensing Office (BPLO) head Atty. Patrick Legaspi.

Inihayag din ng Pasay BPLO na ang kompanyang umookupa sa 6th hanggang 10th floors ng gusali ay walang business permit o business license mula sa Pasay City government.

Basehan ito para sa Mission Order na ipinalabas ng lokal na pamahalaan upang pasukin ang kompanya.

“Obviously itong grupo ng mga mag-po-POGO na ito, harap-harapan nang binabastos ang mga batas natin. Masyado na silang garapal despite may closure order na sila from PAGCOR ay nag ooperate pa rin sila ng full blast,” giit ni PAOCC Executive Director Undersecretary Gilbert Cruz.

Anang PAOCC, narito ang breakdown ng foreign nationals na nadakip:

• Chinese Nationals – 207

• Vietnamese Nationals – 132

• Korean Nationals-24

• Malaysian Nationals – 11

• Indonesian Nationals – 14

• Myanmar Nationals – 12

• Madagascar National – 1

Sinabi rin ng PAOCC na mayroon ding 52 Filipino workers na natagpuan sa scam hub.

“Nagtataguan ang mga foreigners. May mga nasa aircon duct. Basta nagtatago sila. Ayaw na makita sila ng mga pulis,” ani CIDG Director Police Major Gen. Nicolas Torre III.

“We’ve already coordinated with the Bureau of Immigration para ma-check ang legality ng kanilang stay. Hanapin natin ang mga passport, ang kanilang mga work visa,” dagdag niya.

“Mayroon silang mga equipment dito na nakakapag-blast ng maraming mga messages. We suppose na ito rin yung mga nagpapadala ng mga phishing links. It’s a matter of examining and looking for the correct data based on a valid search warrant,” paglalahad ng opisyal.

Batay sa inisyal na findings ng DOJ-OOC, ilang scams ang isinasagawa sa pasilidad tulad ng love scams at investment scams.

Naniniwala ang DOJ-OOC na ipinahihiwatid nitong mga Pilipino rin at hindi lamang mga dayuhan ang nabiktima ng umano’y alleged scam hub.

“Ito mas nakakabahala kasi mayroong mga Pilipinong involved. So ibig sabihin hindi lang mga foreigners ang victims nila. Nambibiktima rin sila ng mga Pilipino dito pa mismo sa ating bansa,” ani Protacio-Ladislao.

Nag-isyu naman ang Pasay LGU ng closure order at ikinandado ang nasabing establisimiyento.

“Sa lahat ng mga nag-ooperate pa ng POGO, hindi namin kayo papayagan talaga. Sila ay mananagot sa batas na kanilang vina-violate at sila ay isasara,” giit ni Pasay Mayor Emi Calixto-Rubiano.

“Mayroon kaming activities dito, recorded, kung how frequent namin binibisita ang mga lugar na nagkakaroon ng POGO dati at ngayon, closed na namin. Pero siguro, gano’n talaga, parang aso’t-pusa, hindi lang sa POGO, sa vendors, etc. Pag ini-inspect, nawawala,” dagdag niya.

Nangako rin ang Philippine Amusement and Gaming Corporation (PAGCOR) na tutulong sa pagsawata sa hubs.

“Every week ngayon umiikot pa rin ang PAGCOR team para siguraduhing yung mga dating pinanggalingan na mga ito ay sarado na. Pag may natatanggap kaming impormasyon sa taumbayan o sa mga tipster, kaagad namin itong fino-forward sa PAOCC,” pahayag ni PAGCOR Chairman at CEO Alejandro Tengco. RNT/SA