MANILA, Philippines- Tinatayang nasa higit P7.6 milyong halaga ng Ecstasy tablet o mas kilala na “party drugs” ang nasamsam ng mga tauhan ng Bureau of Customs (BOC) Port of Clark sa pakikipag-ugnayan sa Philippine Drug Enforcement Agency – Airport Interdiction Unit (PDEA-AIU), makaraang mabuking ito na itinago sa mga kahon ng gummy candies at Belgian waffle biscuits.
Ayon sa BOC, nagmula ang nasabing kontrabando sa Brussels, Belgium at patungo sana sa Quezon City.
Nabatid na isinagawa ang nasabing operasyon makaraang makatanggap ng impormasyon mula sa PDEA hinggil sa pagpasok ng nasabing kontrabando.
Nabatid na isang K-9 sniff test ang kalaunan ay isinagawa ng Customs Examiners at mga operatiba ng PDEA na nagbunga ng mga positibong resulta para sa mga ilegal na substance, na nag-udyok sa isang buong pisikal na pagsusuri sa parsela. Natuklasan sa inspeksyon ang pitong kahon na naglalaman ng gummy candies, na nagtatago rin ng kabuuang 4,491 tablet na pinaghihinalaang Ecstasy o MDMA.
Sa pagsusumite sa PDEA para sa chemical analysis, ang substance ay nakumpirma na Methylenedioxymethamphetamine (MDMA), isang ipinagbabawal na gamot sa ilalim ng mga probisyon ng Republic Act No. 9165.
Isang Warrant of Seizure and Detention ang inilabas laban sa shipment para sa mga paglabag sa Section 118(g), Section 119(d), at Section 1113 paragraph (f), (i), at (l) ng Republic Act No. 10863, o ang Customs Modernization and Tariff Act (CMTA), kaugnay ng R.A. No. 9165. JAY Reyes
