MANILA, Philippines – Naglatag ang Registry of the International Criminal Court ang panukalang pamamaraan para sa paglilitis kay dating Pangulong Rodrigo Duterte na nahaharap sa mga reklamong crimes against humanity.
Kabilang sa mga rekomendasyon ng ICC Registry, na nagbibigay ng administrative at operational support sa Chamber at sa Office of the Prosecutor, ay ang pangangailangan sa mga partido at participant na malinaw na tukuyin ang proposed redactions sa mga transcript ng email at ipasa ito sa Registry kasama ang corresponding post facto redactions form.
Inirekomenda rin ng Registry ang pag-adopt sa transcript verification process na ginamit sa kaso ni Prosecutor v. Mahamat Said Abdel Kani.
Hinimok din nito ang Trial Chamber III, maging ang mga partido at participant, na gamitin ang
witness-entity at evidentiary-materials (E-binders) modules sa Judicial Workflow Platform, “so that the record of the case may be maintained within a single, consolidated, and comprehensive platform.”
Sa unang status conference noong Mayo 27, sinabi ni ICC Trial Chamber III Presiding Judge Joanna Korner na ang korte ay mag-uutos ng reexamination ng fitness ni Duterte na humarap sa paglilitis.
Itinakda ng korte ang paglilitis sa Nobyembre 30, 2026.
Magdaraos pa ito ng dalawa pang status conference sa Hunyo 23 at Hulyo 14. RNT/JGC
