MANILA, Philippines – Bagamat humupa na ang matinding daloy ng trapiko sa North Luzon Expressway (NLEX) ay nananatiling hindi madaanan ang ilang lane dahil sa water buildup.
Sa traffic update ng NLEX nitong Biyernes ng gabi, Setyembre 4, sinabi na maluwag na ang daloy ng mga sasakyan sa karamihan ng northbound exits, kabilang ang Sta. Rita Northbound Entry, Balagtas Northbound Entry, Pulilan Northbound, Tulaoc (San Simon), at San Simon Interchange.
Sa kabila nito ay nananatiling sarado ang Libtong Exit.
Para naman sa southbound traffic ay maluwag ang daloy ng mga sasakyan sa Balintawak Exit, Valenzuela hanggang NLEX Harbor Link Interchange, Candaba Viaduct, Tulaoc (San Simon), at San Simon Interchange.
Sa kabila nito ay nananatiling hindi madaanan ang lane 3 ng southbound at northbound roads sa Tulaoc at San Simon dahil sa water buildup.
“Traffic management measures were implemented as needed to help manage traffic flow and assist motorists amid the water buildup in the NLEX San Simon area caused by the overflow of the Pampanga River,” sinabi ng NLEX Corporation.
Kabilang sa mga hakbang ang traffic filtering, vehicle restrictions, toll plaza regulation, temporary entry closures, designated U-turn slots, strategic diversions, at counterflow operations. RNT/JGC
