MANILA, Philippines – Arestado ng Philippine National Police – Criminal Investigation and Detection Group (PNP-CIDG) ang dalawang tao sa loob ng tahanan ng isang kongresista sa Concepcion, Tarlac noong Disyembre 5.
Ayon sa PNP-CIDG, isinasagawa ang operasyon matapos maglabas ng tatlong search warrants laban sa kongresista, kanyang asawa, at isang Engr. Nilo sa Barangay San Vicente, Concepcion, dahil sa paglabag sa Republic Act No. 10591 o Comprehensive Firearms and Ammunition Regulation Act.
Ang mga naarestong indibidwal ay kinilala bilang si Gene, anak sa manugang ng kongresista, at si Jaime, security guard ng kongresista.
“Sila ay nahuli habang may hawak at kontrol sa tatlong firearms na may expired license at permit,” ayon sa PNP-CIDG.
Nakuha rin sa operasyon ang sampung loose firearms at ammunition.
Ayon sa PNP-CIDG, ang operasyon ay bahagi ng kanilang patuloy na pagsisikap na masugpo ang illegal na baril na maaaring magamit sa krimen o ng pribadong armadong grupo. RNT/MND
