MANILA, Philippines – Tinapos na ng House committee on good government and public accountability nitong Miyerkules, Hunyo 4, ang imbestigasyon nito sa paggamit ng Office of the Vice President Sara Duterte at Department of Education sa P612.5 milyong halaga ng confidential funds.
Ito ay matapos na i-adopt ng komite ang mosyon na isinulong ni Abang Lingkod party-list Rep. Stephen Paduano.
Bagama’t hindi pa nailalabas ang committee report, sinabi ni committee chaiperson Manila 3rd District Rep. Joel Chua na ito ay ilalabas “maybe by next week.”
Bago ang pagtatapos ng pagdinig, sinabi ng tatlong miyembro ng panel noong Disyembre na ang Bise Presidente, at ilang opisyal ng OVP at DepEd ay maaaring maharap sa reklamong plunder, technical malversation of public funds at falsification of public documents and perjury
Ayon kina Reps. Gerville Luistro ng Batangas, Raul Bongalon ng Ako-Bicol party-list, at Johnny Pimentel ng Surigao del Sur, ito ay dahil sa mga pinasang acknowledment receipts ng OVP at DepEd na may mali-maling petsa, signatories na walang birth records, unnamed at non-readable names ng signatories para ma-liquidate ang inilabas na confidential fund.
Dagdag pa, sinabi rin ni Luistro na posibleng mapanagot si Duterte at iba pang opisyal ng OVP at DepEd sa bribery at corruption of public officers, sa mga natukoy na testimonya na nagpaulan ang Bise Presidente ng mga pera sa mga opisyal ng DepEd.
Sa kabila nito, sinabi ni Chua na hindi pa niya masabi kung ang mga rekomendasyong ito ay lalabas sa committee report.
“The decision will still have to be made by the committee,” aniya. RNT/JGC
