MANILA, Philippines – Hindi uusad sa Kamara ang anumang hakbang ng impeachment laban kay Pangulong Ferdinand Marcos Jr., ayon kay Deputy Speaker Ronaldo Puno nitong Biyernes, Enero 16.
Ani Puno, chairman ng National Unity Party, hindi susuportahan ng majority bloc ang naturang hakbang.
Matatandaan na sinabi ni Senior House Deputy Minority Leader Rep. Edgar Erice na plano ng ilang mambabatas na maghain ng impeachment complaint laban kay Marcos dahil sa “betrayal of public trust,” at iba pang grounds.
“What I’m saying is that, well, obviously we are in the majority. We do not believe that any impeachment against President Marcos is going to prosper, and we’re obviously not going to support that,” ani Puno.
“Other impeachment complaints against other officials, we’ll have to follow the process in Congress now,” dagdag pa niya.
Ipinaliwanag ni Puno ang impeachment process na isinagawa noong nakaraang taon partikular ang kasong inihain laban kay Vice President Sara Duterte.
Aniya, ang reklamo ay iniharap sa Kongreso at inendorso ng mahigit 130 mambabatas na kalaunan ay umabot sa 200 ang signatories dahilan para agad itong maipasa sa Senado.
Sa kabila nito, ang kaso ay kalaunang iniakyat sa Korte Suprema na nagpataw ng karagdagang kondisyon sa impeachment process, partikular sa kung paanong ang una at mga sumunod na impeachment complaints ay ma-interpret.
Bilang resulta, naging mahirap ang proseso o halos imposible.
Sa kasalukuyang sitwasyon, sinabi ni Puno na ang impeachment complaints ay dapat na mai-refer sa House Committee on Justice, na sasailalim sa mga pagdinig at mahabang proseso. RNT/JGC
