MANILA, Philippines – Kabilang ang “loose investment” at “return of capital” sa mga unang termino sa isang “impeachtionary” glossary na binubuo ni Senator-Judge Panfilo “Ping” M. Lacson mula sa mga salitang ginamit sa impeachment trial ni Vice President Sara Duterte-Carpio.
Sa isang post sa kanyang X account nitong Huwebes, nagdagdag din si Lacson ng ikatlo at mas nakatatawang termino sa unti-unting nabubuong glossary: ang “wiwi break.”
“‘IMPEACHTIONARY’ GLOSSARY: 1. Loose Investment; 2. Return of capital;
3. Wiwi break. To be continued…” aniya sa X.
Nabanggit ang terminong “loose investment” noong Day 42 ng paglilitis sa impeachment nang sabihin ni GenCorp Industries Inc. counsel Suzette Punay na nakatanggap ang Bise Presidente ng P2.14 milyon mula sa GenCorp mula 2022 hanggang 2025 bilang “return of capital” mula sa isang “loose investment” na ginawa niya sa isang sangay ng Jollibee sa Davao City.
Ayon kay Punay, namuhunan ang Bise Presidente sa naturang sangay noong 2007, at nailipat ang sangay at ang kanyang puhunan nang magpalit-palit ng kumpanyang namamahala sa operasyon nito. Dagdag niya, wala umanong shares o posisyon sa GenCorp ang Bise Presidente mula 2022 hanggang 2025.
Nang hingan siya ni Presiding Officer Francis Escudero ng paliwanag kung ano ang ibig sabihin ng “loose investment,” sinabi ni Punay na siya mismo ang lumikha ng naturang termino.
Samantala, nagbigay naman ng nakatatawang sandali si lawyer Lorna Kapunan, isa sa mga pribadong abogadong tumutulong sa House prosecution panel, nang humiling siya ng “wiwi break” upang gumamit ng palikuran sa gitna ng kanyang cross-examination kay Punay.
Sa pagdinig noong Miyerkules, iginiit din ni Lacson na labag hindi lamang sa lohika kundi maging sa sentido kumon ang pagdedeklara sa Statement of Assets, Liabilities and Net Worth (SALN) ng isang ari-ariang hindi naman kailanman pag-aari ng nagdedeklara.
“Would you have declared an asset in your SALN that you’ve never owned or had in the first place and in fact at any point in your life? … Because if you did, it defies logic and even common sense,” tanong niya kay Punay, na sumang-ayon na hindi makatuwiran at labag sa sentido kumon ang pagdedeklara ng isang ari-ariang hindi naman kailanman naging pag-aari ng isang tao. Ernie Reyes
