MANILA, Philippines – Sinabi ni Executive Secretary Lucas Bersamin nitong Sabado, Oktubre 25 na ang paglalabas ng Statements of Assets, Liabilities and Net Worth (SALNs) ng Pangulo at mga miyembro ng Gabinete ay para sa “legitimate” purposes lamang at iginiit na ang mga dokumentong ito ay maaaring magamit laban sa mga opisyal ng pamahalaan.
Ani Bersamin, bagamat sinasabi sa 1987 Constitution na ang SALN ay isang public document at dapat na isipin na “it should always be accessible to the public,” hindi naman umano nila papayagan ang “indiscriminate freedom to access these SALNs.”
“You must all take note that SALN contains details that may compromise the security, safety of the public officials concerned,” sinabi ni Bersamin sa isang panayam.
Si Bersamin, dating Supreme Court chief justice, na ang request para sa SALN ng ilang opisyal ng pamahalaan ay dapat na lehitimo.
“We will not deny access but we must control the access… There should always be a request,” ani Bersamin sabay-sabing “the purpose must be legitimate because we do not want the SALN to be a weapon because that will deter the service to the public sector.”
“You must not ever forget that Cabinet secretaries are the alter-egos of the President. They are entitled to a level of security and privacy,” ayon pa kay Bersamin.
Noong Oktubre 15, sinabi ni Pangulong Ferdinand Marcos Jr. na ang kanyang SALN ay available sa kahit sinong mangangailangan nito kabilang ang Independent Commission for Infrastructure (ICI).
Siniguro rin ng Pangulo na sasama ito sa kanyang mga Gabinete sa paglalabas ng mga SALN.
Nauna nang sinabi ni Palace Press Officer Undersecretary Atty. Claire Castro na pag-uusapan ng mga miyembro ng Gabinete ni Marcos ang usapin patungkol sa SALN.
Kamakailan ay nag-isyu si Ombudsman Jesus Crispin Remulla ng memorandum circular na nag-aalis sa restriksyon sa public access sa mga SALN ng opisyal ng pamahalaan.
Ang bagong polisiya ay ang pagbabaliktad sa 2020 memo na inisyu ng pinalitan ni Remulla na si dating Ombudsman Samuel Martires, sa restriksyon sa pag-access sa SALN na nag-oobliga muna ng consent mula sa may-ari nito. RNT/JGC
