Ismagel na sibuyas buking sa Paco Market

MANILA, Philippines – Nagsagawa ng monitoring at inspeksyon ang Department of Agriculture (DA) na pinangunahan ni Agriculture Secretary Francisco Tiu Laurel Jr. sa pagbisita sa Paco Public Market kung saan nadiskubre ang mga ismagel na sibuyas.

Sa nasabing inspeksyon, kasama ang ilang opisyal ng agrikultura, nais ng kalihim na personal na makita ang sitwasyon ng bentahan ng mga produktong agrikultura sa naturang palengke at malaman ang kasalukuyang presyo ng mga bilihin.

Isa-isang kinausap ni Laurel ang mga vendors sa palengke at sinabi na nakasusunod naman ang iba sa presyo ng mga pangunahing produkto.

Gayunman, napansin ni Laurel at ng mga kasama, kabilang si P/Lt. General Edgar Alan Okubo, Chief Directorial Staff ng PNP, na may smuggled na sibuyas na ibinibenta sa palengke.

Bagamat hindi papanagutin ng DA ang mga nagbebenta ng smuggled na sibuyas, kanila namang aalamin kung sino ang kanilang supplier o nagbabagsak nito sa palengke.

Lalo namang paiigtingin ng DA ang kampanya kontra smuggling katuwang ang PNP.

Binalaan din ang mga gumagawa ng iligal na sisiguraduhin ng pamahalaan na mapanagot sila sa batas.
(Jocelyn Tabangcura-Domenden)