MANILA, Philippines – NAARESTO ng mga tauhan ng Bureau of Immigration (BI) ang isang Italian national na wanted ng mga awtoridad sa Roma dahil sa panggagahasa at sekswal na pananakit sa isang menor de edad 12 taon na ang nakararaan.
Kinilala ni Immigration Commissioner Norman Tansingco ang pugante na si Stefano Todeschini, 57-anyos, na naaresto noong Abril 5 sa Lahug, Cebu City ng mga operatiba mula sa fugitive search unit (FSU) ng BI.
Ayon kay Tansingco, si Todeschini ay inaresto sa bisa ng isang mission order na kanyang inilabas sa kahilingan ng Italian embassy sa Manila na humiling sa kanyang deportasyon upang siya ay makaharap sa paglilitis para sa kanyang mga krimen.
Idinagdag ng BI chief na ang Italyano ay napapailalim sa isang Interpol red notice na nag-ugat sa pagpapalabas ng arrest warrant laban sa kanya ng prosecutor’s office ng isang korte sa Vicenza, Italy.
Si Todeschini ay iniulat na kinasuhan sa harap ng nasabing hukuman para sa panggagahasa at sekswal na pag-atake laban sa isang menor de edad na lumalabag sa Italian penal code.
Inakusahan ng mga tagausig na ginawa ni Todeschini ang mga krimen laban sa isang sampung taong gulang na batang babae sa maraming pagkakataon.
Nabatid na isa rin itong undocumented alien dahil ang kanyang Italian passport ay nag-expire na noong Mayo 2017.
“This should serve as another warning to foreign criminals that the long arm of the law with catch them wherever they might hide,” ani Tansingco.
Nakakulong ngayon si Todeschini sa BI warden facility sa Camp Bagong Diwa, Taguig City habang nakabinbin ang deportation proceedings nito. JAY Reyes
